DÖVLƏT GÖMRÜK KOMİTƏSİNDƏ İĞDIR BƏLƏDİYYƏSİNİN NÜMAYƏNDƏ HEYƏTİ İLƏ GÖRÜŞ
Türkiyə Respublikası ilə Azərbaycan Respublikası arasında dostluq və qardaşlıq münasibətlərinin davamlı inkişafından məmnunluğunu bildirən K.Heydərov, blokada şəraitində yaşayan Naxçıvan Muxtar Respublikasının ən çətin illərində Türkiyənin, eləcə də İğdır vilayətinin bölgənin əhalisinə göstərdiyi yardımları qardaş dəstəyi kimi dəyərləndirmiş, ümummilli lider Heydər Əliyevin doğma xalqının rifahı naminə yorulmaz fəaliyyəti nəticəsində ölkələrimiz arasında “Ümid” körpüsünün tikilərək istifadəyə verildiyini və bununla da Naxçıvanın düçar olduğu ağır şəraitdən, blokadadan qismən də olsa qurtula bildiyini diqqətə çatdırmışdır.
Komitə sədri eyni zamanda Sədərək gömrük keçid məntəqəsinin dünya standartlarına uyğun inşa edilərək istifadəyə verilməsini Azərbaycan ilə Türkiyə, eləcə də iki qardaş ölkənin gömrük orqanları arasında əlaqələrin inkişafına böyük töhfə olduğunu söyləmişdir.
Türkiyə ilə Azərbaycan arasında iqtisadi-ticari əlaqələrdən danışan komitə sədri ölkələrimizin birbaşa ticarət münasibətlərinin Sədərək-Dilucu gömrük idarələri tərəfindən həyata keçirildiyini, ticarət dövriyyəsinin yaxın zamanlarda daha da artırılmasında heç bir problemin olmadığını söyləmiş, bildirmişdir ki, Azərbaycanda fəaliyyət göstərən türk iş adamları ilə gömrükçülər arasında sıx əlaqələr yaranmışdır. Məhz bunun nəticəsi olaraq onların gömrüklə bağlı ortaya çıxa bilən hər hansı problemləri dərhal öz həllini tapır.
Səmimi qəbula görə təşəkkür edən İğdır bələdiyyəsinin sədri Nurəddin Aras qardaş Azərbaycanda olmağından məmnunluğunu bildirmiş, ümummilli lider Heydər Əliyevin əziz xatirəsini anmaq üçün Bakıya gəldiklərini söyləmişdir. O, belə bir məqama diqqəti yönəltmişdir ki, ümummilli lider Heydər Əliyevin təşəbbüsü ilə gələcəyə tuşlanan “Ümid” körpüsünün istifadəyə verilməsi nəticəsində insanlarımız uzun illərin ayrılığına son qoyaraq bir-birinə qovuşmuşlar.
Nurəddin Aras demişdir ki, ümummilli liderimiz Heydər Əliyevin adına İğdırda park salmışıq və həmin yerdə onun büstünü qoymuşuq. Eyni zamanda, Naxçıvandan İğdıra gedən yolun kənarında Azərbaycan Prezidenti İlham Əliyevin adını daşıyan bulvar salmışıq. Nurəddin Aras bulvarın açılışında DGK sədri K.Heydərovu görməkdən məmnunluq duyacaqlarını qeyd etmişdir. Qonaq Türkiyə ilə Azərbaycan arasında əlaqələrin davamlı inkişafını yüksək qiymətləndirərək, iqtisadi sahədə də durumun ürəkaçan olduğunu, ticarət dövriyyəsinin ilbəil artacağına əminliyini ifadə etmişdir.
İğdırlı iş adamlarının Azərbaycandakı fəaliyyətindən, onların gömrüklə bağlı probleminin olmamasından razılıqla söhbət açan Nurəddin Aras, bütün bunların yalnız ümumi işin xeyrinə təkan verdiyini söyləmişdir.
Görüşdə maraq doğuran digər məsələlər ətrafında da fikir mübadiləsi aparılmışdır.
Bölmənin digər xəbərləri
