-Möhtərəm cənab Prezident!

Hörmətli müşavirə iştirakçıları!

2007-ci ili əhatə edən dövr Azərbaycan Respublikasının sosial-iqtisadi həyatı üçün son dərəcə uğurlu olmuşdur. Ümummilli liderimiz Heydər Əliyevin təməlini qoyduğu və cənab Prezident, məhz Sizin bilavasitə rəhbərliyiniz sayəsində həyata keçirilən məqsədyönlü və çevik sosial- iqtisadi islahatlar respublikamızda əsaslı dəyişikliklərə səbəb olmuşdur. Həyatın bütün sahələrini əhatə edən quruculuq, abadlıq işləri, əlverişli investisiya mühiti və regionların sosial-iqtisadi inkişafına dair Dövlət proqramı Azərbaycan Respublikasının güclü inkişafını reallaşdırmışdır.

Ölkənin iqtisadi cəhətdən qüdrətlənməsi və sosial iqtisadi islahatların həyata keçirilməsində gömrük siyasətinin də rolu vardır. Gömrük orqanları illik büdcə gəlirlərinin formalaşmasında yaxından iştirak etməklə ötən hesabat ilində fəallıq göstərərək “Dövlət büdcəsi haqqında” Azərbaycan Respublikasının Qanunu ilə gömrük vergi və rüsumları üzrə müəyyən edilmiş proqnozun artıqlaması ilə yerinə yetirilməsini təmin etmişdir. Belə ki, rəsmiləşdirilməsi bitmiş yük gömrük bəyannamələri əsasında xarici ticarətin ümumi dövriyyəsi 10 milyard 957,9 milyon ABŞ dolları, o cümlədən ixracın 5 milyard 265,1 milyon ABŞ dolları, idxalın isə 5 milyard 692,8 milyon ABŞ dolları təşkil etdiyi 2007-ci ildə Dövlət Gömrük Komitəsi tərəfindən 771,9 milyon manat məbləğində gömrük vergi və rüsumları toplanaraq dövlət büdcəsinə keçirilmiş, illik proqnoza 100,3 faiz əməl olunmuşdur. Bu da ötən illə müqayisədə 255,9 milyon manat və yaxud 49,6 faiz çoxdur.

Qeyd etmək lazımdır ki, gömrük vergi və rüsumlarının həcminin artımı təkcə ölkə üzrə xarici ticarət dövriyyəsinin artımı hesabına deyil, eyni zamanda, gömrük nəzarətinin, qaçaqmalçılıq və gömrük qaydalarının pozulması halları ilə mübarizənin gücləndirilməsi, maliyyə intizamının daha da möhkəmləndirilməsi istiqamətində həyata keçirilən məqsədyönlü tədbirlər nəticəsində əldə olunmuşdur.

Möhtərəm cənab Prezident!

Hesabat dövründə ölkəmizdə gömrük sisteminin inkişafını sürətləndirmək, onun normativ hüquqi və maddi-texniki təminatını yaxşılaşdırmaq və gömrük orqanlarının fəaliyyətini daha da təkmilləşdirmək məqsədi ilə Azərbaycan Respublikası gömrük sisteminin 2007-2011-ci illərdə inkişafına dair Dövlət proqramı Azərbaycan Respublikası Prezidentinin 2007-ci il 1 fevral tarixli Sərəncamı ilə təsdiq edilmişdir. Azərbaycan Respublikasının Dünya Ticarət Təşkilatına üzv olması prosesi ilə əlaqədar qanunvericiliyin Dünya Ticarət Təşkilatının tələblərinə uyğunlaşdırılması üzrə tədbirlər planının təsdiq edilməsi barədə Azərbaycan Respublikası Prezidentinin 2006-cı il 2 avqust tarixli Fərmanının tələblərinə uyğun olaraq, hazırda qüvvədə olan gömrük qanunvericilik aktlarının, o cümlədən gömrük məcəlləsinin müvafiq maddələrinin Dünya Ticarət Təşkilatının tələblərinə uyğunlaşdırılması ilə əlaqədar tərəfimizdən müvafiq tədbirlər həyata keçirilmişdir.

2007-ci il ərzində gömrük orqanları dövlət büdcəsinin mühüm hissəsinin formalaşmasını təmin etməklə yanaşı, hüquq mühafizə orqanı kimi respublikanın iqtisadi mənafeyinin və təhlükəsizliyin qorunması, qaçaqmalçılığa və gömrük işi sayəsində hüquqpozmalara qarşı mübarizə aparılması, bu cür halların aşkar edilməsi, qarşısının alınması və aradan qaldırılması istiqamətində də məqsədyönlü işlər aparmışdır.

2007-ci ildə gömrük orqanları tərəfindən gömrük işi sahəsində hüquqpozmalara qarşı mübarizə istiqamətində görülən tədbirlər nəticəsində 4689 hüquqpozma faktı aşkar edilmişdir. Narkotik vasitələrin, psixotrop maddələrin və prekursorların qanunsuz dövriyyəsi və narkomanlığın yayılması ilə mübarizə üzrə proqramın icrasını təmin etmək məqsədi ilə gömrük orqanlarının digər hüquq mühafizə orqanları ilə əməkdaşlığı şəraitində ötən dövr ərzində narkotik vasitələrin qanunsuz dövriyyəsi ilə əlaqədar 47 fakt aşkar edilmiş, həmin faktlar üzrə 124 kiloqram narkotik maddə tutulmuşdur.

Bir çox bədii, tarixi və incəsənət əhəmiyyəti kəsb edən əşyalar və eyni zamanda, 13 min 469 ədəd dini kitab saxlanılmışdır. Dövlət Gömrük Komitəsi Azərbaycan Respublikası Prezidentinin 2004-cü il 9 dekabr tarixli Fərmanı ilə təsdiq edilmiş “Azərbaycan Respublikasında milli ödəniş sisteminin inkişafı üzrə 2005-2007-ci illər üçün Dövlət proqramı”nda nəzərdə tutulduğu kimi, iri gömrük idarələrində rüsum və vergilərin kartlardan istifadə olunmaqla POS-terminallar vasitəsilə dövlət büdcəsinə ödənişi təmin olunmuş, digər gömrük orqanlarında isə POS-terminalların quraşdırılmasına başlanmışdır.

Hesabat ilində Gömrük Komitəsinin və onun yerli gömrük orqanlarının maddi-texniki bazasının möhkəmləndirilməsi istiqamətində işlər görülmüş, komitənin mərkəzi aparatında və bir sıra gömrük idarələrində tikinti-quraşdırma və abadlıq işləri aparılmışdır. Komitənin tibbi-xidmət idarəsində mühəndis şəbəkə və tamamlama işləri, Hava Nəqliyyatında Baş Gömrük İdarəsinin və Əli Bayramlı gömrük idarəsinin inzibati binalarında kompleks tikinti işləri başa çatmış, Yevlax Gömrük İdarəsinin inzibati binasında, Xaçmaz Gömrük İdarəsinin Samur, Tovuz Gömrük İdarəsinin Sınıq Körpü, Balakən Gömrük İdarəsinin Mazımçay, eyni zamanda, Astara və Biləsuvar gömrük idarələrinin sərhəd keçid buraxılış məntəqələrində isə kompleks tikinti işləri də davam etdirilmişdir.

Cənab Prezident, Azərbaycan Respublikasının 2008-ci il büdcəsi haqqında qanuna əsasən Dövlət Gömrük Komitəsi üçün cari ilə büdcə gəlirləri üzrə 1 milyard 100 milyon manat məbləğində proqnoz müəyyən edilmişdir ki, bu da ötən ilin göstəriciləri ilə müqayisədə 330 milyon manat və yaxud 42,9 faiz çoxdur. 2008-ci il üzrə müəyyən olunmuş büdcə proqnozunun yerinə yetirilməsi üçün artıq müvafiq tədbirlərin həyata keçirilməsinə başlanmışdır. Belə ki, Azərbaycan Respublikasının Nazirlər Kabinetinin Azərbaycan Respublikası ərazisinə gətirilən əlavə dəyər vergisindən azad olunan malların siyahısı haqqında hökumətin 2005-ci il 31 yanvar tarixli 11 nömrəli qərarına dəyişikliklər edilməsi barədə 2007-ci il 30 dekabr tarixli 220 nömrəli qərarı qəbul edilmişdir. Bu qərara əsasən bəzi lüzumsuz azadolmalar aradan qaldırılmışdır.

Möhtərəm cənab Prezident!

Fürsətdən istifadə edərək, Sizi və bugünkü müşavirə iştirakçılarını əmin etmək istərdim ki, Dövlət Gömrük Komitəsi və onun yerli orqanları öz işini Azərbaycan Respublikasının gömrük qanunvericiliyinə uyğun qurmaqla, ölkəmizin müstəqilliyinin, iqtisadi təhlükəsizliyinin qorunması, xarici iqtisadi fəaliyyət iştirakçılarının gömrük xidmətinin dünya standartlarına uyğunlaşdırılması ilə yanaşı, cari ildə müəyyən edilmiş proqnozun əvvəllər olduğu kimi artıqlaması ilə yerinə yetirilməsi üçün bütün imkanlarını səfərbər edəcəklər.

Diqqətinizə görə sağ olun.