DÖVLƏT HİMNİNİN MƏTNİ ÜZRƏ II BƏDİİ QİRAƏT MÜSABİQƏSİNİN FİNAL MƏRHƏLƏSİ KEÇİRİLMİŞDİR
Bakı, 27 may (AZƏRTAC). Rəşid Behbudov adına Dövlət Mahnı Teatrında Bakı Şəhər Gənclər və İdman Baş İdarəsinin (BŞGİBİ) təşkilatçılığı ilə 28 may - Respublika günü münasibətilə Bakı şəhər ümumtəhsil məktəblərinin şagirdləri arasında dövlət himninin mətni üzrə II bədii qiraət müsabiqəsinin final mərhələsi keçirilmişdir.
BŞGİBİ-nin rəisi Raqif Abbasov bildirmişdir ki, müsabiqənin məqsədi dövlət himninin sözlərinin gənclər arasında təbliği, gənclərin şeir ifası sahəsində öz istedadlarını nümayiş etdirməsinə şərait yaradılması, gənclərin vətənpərvərlik ruhunda tərbiyəsidir.
Müsabiqə ayrı-ayrılıqda oğlanlar və qızlar arasında keçirilmişdir. Rayon mərhələsində I yeri qazanmış şagirdlər finalda özlərini sınamışlar.
Qızlar arasında I yeri Ülviyyə Məmmədzadə, II yeri Bahar Qarayeva, III yeri Aytən Əhmədli tutmuşdur. Oğlanlar arasında isə I yerə Elnur Əliyev, II yerə Arif İbadullayev, III yerə Toğrul Orucov layiq görülmüşlər.
Qaliblər diplomlar və pul mükafatı ilə təltif edilmişlər.
Sonda şagirdlərin ifasında Azərbaycan Respublikasının dövlət himni səsləndirilmişdir.
Bölmənin digər xəbərləri
