Dövlət qulluğuna qəbul imtahanlarında uğur qazananların əksəriyyəti gənclərdir
Bakı, 3 mart, AZƏRTAC
Ümumilikdə imtahanlarda müvəffəqiyyət əldə edən 651 nəfər (uğur əldə edənlərin təqribən 88 faizi, 281 kişi və 370 qadın) 20‑29 yaş intervalında olan namizədlərdir. 30-39 yaş intervalında isə 85 nəfər (42 kişi və 43 qadın) lazım olan balı toplaya bilib.
AZƏRTAC xəbər verir ki, bu, inzibati vəzifələrin A və B növünə (inzibati rəhbər və icraçı vəzifələr) aid olan AA, AB, AC, BA və BB qruplarına uyğun vəzifələr üzrə Dövlət İmtahan Mərkəzi tərəfindən fevralın 19-da keçirilmiş imtahanlarda iştirak etmiş namizədlərin yaş kateqoriyası və gender aspektləri haqqında statistik məlumatlarda əksini tapıb.
Yuxarı yaş qrupları (45-64 yaş intervalı) üzrə 17 nəfər (9 kişi, 8 qadın) qeydiyyatdan keçsə də, imtahanda yalnız 1 nəfər (1 qadın) uğur qazana bilib. Ümumiyyətlə, imtahanda iştirak edən 40 yaşdan yuxarı namizədlərdən yalnız 4 nəfər imtahanı uğurla keçib.
İmtahanlarda uğur qazanan namizədlərin 721 nəfəri, yəni təqribən 97.4 faizi yaşı 34-ə qədər olan insanlardır. 35-64 yaş intervalında olan və imtahanı uğurla keçən namizədlərin sayı 19 nəfərdir.
Bölmənin digər xəbərləri
