DÖVLƏT SƏRHƏD XİDMƏTİ ÖLKƏMİZİN DƏNİZ SƏRHƏDLƏRİNİN MÜHAFİZƏSİNİ GÜCLƏNDİRİR
Martın 2-də yeni mühafizə məntəqələrinin təntənəli açılış mərasimləri olmuşdur. Mərasimlərdə Dövlət Sərhəd Xidməti rəisinin müavini general-mayor İlham Mehdiyev və digər rəsmi şəxslər iştirak etmişlər. Mərasim iştirakçıları bildirmişlər ki, yeni mühafizə məntəqələri sahilyanı ərazinin mühafizəsinin gücləndirilməsinə, Xəzər dənizinə çıxan böyük və kiçik həcmli qayıqların rəsmiləşdirilməsi işlərinə öz töhfələrini verəcəkdir.
Məntəqələr lazımi texnika və vasitələrlə təmin edilmiş, şəxsi heyətlə tam komplektləşdirilmişdir. Yeni mühafizə məntəqələrinin tikintisi keyfiyyətlə və yüksək standartlar səviyyəsində aparılmışdır. Burada sərhədçilərə xidməti döyüş fəaliyyətlərini nümunəvi şəkildə yerinə yetirmələri üçün yüksək şərait yaradılmışdır.
Dövlət Sərhəd Xidməti dəniz sərhədlərinin mühafizəsinin gücləndirilməsi və dənizdə neft-qaz infrastrukturunun təhlükəsizliyinin təmin edilməsi məqsədilə təkcə ötən il Abşeron yarımadasında 7 yeni mühafizə məntəqəsi tikilib istifadəyə verilmişdir. Sərhəd gözətçi gəmilərində müasir mühərriklər, naviqasiya, radio-rabitə və digər zəruri avadanlıqlar quraşdırılmışdır. Görülən tədbirlər nəticəsində sahil mühafizəsi xeyli güclənmiş, dənizdə müşahidə, axtarış, nəzarət imkanları artmışdır. Qeyd olunmalıdır ki, ötən il sərhəd gözətçi gəmilərinin dənizdə üzmə müddəti 2004-cü illə müqayisədə 23,5 faiz çoxalmışdır. 2005-ci ildə 108 üzmə vasitəsinə baxış keçirilmiş, dövlət sərhədini pozduqlarına və digər qeyri-qanuni fəaliyyətlərinə görə 36 gəmi, 311 şəxs barəsində müvafiq tədbirlər görülmüşdür.
