Bakı, 11 dekabr, AZƏRTAC

Azərbayan Milli Xalça Muzeyində Ümummilli Lider Heydər Əliyevin 100 illiyi ilə əlaqədar “Dövlətin memarı. Bir ömrün ensiklopediyası” adlı triptix-xalça sərgilənib.

AZƏRTAC xəbər verir ki, tədbirdə əvvəlcə Ulu Öndərə həsr olunmuş videoçarx nümayiş olunub.

Milli Xalça Muzeyinin direktoru Əminə Məlikova çıxışında hər naxışının, hər elementinin altında bir məna, hikmət olan bu əsərin daim dəyərli eksponat kimi saxlanıb, tədqiq ediləcəyinə inamını ifadə edib. Bildirib ki, qədim xalçaçılıq sənəti Ulu Öndər Heydər Əliyevin hər zaman qayğı göstərdiyi və yüksək qiymətləndirdiyi bir sahə kimi müstəqillik illərində daha da inkişaf edib. Məhz onun hakimiyyətə qayıdışından sonra mədəniyyətin digər sahələrində olduğu kimi, xalça sənətində də böyük dirçəliş baş verib.

Mədəniyyət naziri Adil Kərimli deyib: “Bu sənətin inkişafı və dünyaya çatdırılmasında Ulu Öndərin təşəbbüsü və səyləri danılmazdır. Müasir Azərbaycanın memarı Heydər Əliyev mədəniyyətimizi dünyada təbliğ etmək üçün misilsiz addımlar atıb. Bu əsər Ulu Öndərin zəngin irsinin öyrənilməsində yeni mənbədir. Fikrimcə, əsərin zənginliyinin göstəricilərindən biri də xalçaya hər dəfə baxdıqda müəyyən yenilikləri görməyimizdir”.

“Azərxalça” ASC-nin İdarə Heyətinin sədri Emin Məmmədov nümayiş olunan unikal əsərin mənəvi dəyərinə görə toxunan ən qiymətli xalça olduğunu qeyd edib.

Əməkdar rəssam Rəşad Ələkbərov xalçanın İsmayıllı emalatxanasında çalışan 11 toxucu tərəfindən bir ilə yaxın müddətə ərsəyə gətirildiyini diqqətə çatdırıb. “Xalça 2023-cü ilin aprelində təhvil verilib. Üç hissədən ibarət olan əsərdə Ulu Öndərin həyat fəlsəfəsi, daim diqqətdə saxladığı məsələlər, önəm verdiyi dəyərlər ilk dəfə xalça dilində tamaşaçıya çatdırılıb. Biz layihənin məsuliyyətini anlayaraq daha fərqli yanaşma sərgilədik”,- deyə o əlavə edib.

Xalq rəssamı, Azərbaycan Milli Elmlər Akademiyasının həqiqi üzvü Ömər Eldarov xalçaçılıq sənətinin özünəməxsus xüsusiyyətlərinin olduğunu deyib: “Azərbaycanda xalçaçılıq hər zaman inkişaf edib və bu sənətə aid müxtəlif məktəblər fəaliyyət göstərib. Ulu Öndər Heydər Əliyevin ölkəmizə rəhbərliyi dövründə olduğu kimi, yenə də Azərbaycanda bu sənət növünə xüsusi diqqət yetirilir”.

Çıxışlardan sonra Əməkdar artist Ramil Qasımov pianoçu, Əməkdar müəllim Zülfiyyə Sadıqovanın müşayiəti ilə Ulu Öndərin çox sevdiyi nəğmələrdən ikisini - Cahangir Cahangirovun “Alagöz” mahnısını və “Küçələrə su səpmişəm” xalq mahnısını ifa edib.

Sonra qonaqlar “Dövlətin memarı. Bir ömrün ensiklopediyası” xalçası ilə tanış olublar.