DST COVID-19 pandemiyasına qarşı mübarizənin dördpilləli strategiyasını təklif edir
Bakı, 13 mart, AZƏRTAC
Dünya Səhiyyə Təşkilatının (DST) baş direktoru doktor Tedros Gebreyesusun fikrincə, COVID-19 pandemiyasına nəzarət etmək mümkündür, bu şərtlə ki, bütün ölkələr pandemiyanın real təhlükəsini başa düşsünlər və onun qarşısını almaq üçün zəruri tədbirlər görsünlər.
AZƏRTAC BMT-nin saytına istinadla xəbər verir ki, belə tövsiyələrin bu gün heç də hər yerdə nəzərə alınmaması DST başçısını narahat edir.
Doktor Gebreyesus deyib: “Bu gün COVID-19-u pandemiya adlandırmağımız o demək deyil ki, ölkələr ona təslim olmalıdırlar. Əksinə, biz səylərimizi ikiqat artırmalıyıq”. DST rəhbərinin sözlərinə görə, epidemiyanın qarşısının alınması ilə onun nəticələrinin zəiflədilməsini dolaşıq salmaq lazım deyil, bu, çox təhlükəli olardı.
Bu gün ictimai səhiyyənin qorunması üzrə elementar tədbirlər görməkdən imtina edən dövlətlər daha ciddi problemlərlə üzləşəcəklər.
İndiyə qədər koronavirusa yoluxma halları barədə 118 ölkədən və ərazidən məlumatlar daxil olub. Yeni koronavirusa yoluxmuş 125 min insan qeydiyyata alınıb. Son iki həftə ərzində Çinin hüdudlarından kənarda yoluxanların sayı 13 dəfə, COVID-19-un aşkar edildiyi ölkələrin sayı isə 3 dəfə artıb.
Doktor Tedros bütün dövlətləri pandemiyaya qarşı mübarizədə yerli spesifika nəzərə alınmaqla hərtərəfli tədbirlər görməyə çağırıb. DST dövlətləri dörd istiqamət üzrə fəaliyyət göstərməyə çağırır.
Hazır olmaq
Hazırda 77 ölkə və ərazidə yeni koronavirus aşkar edilməsi barədə hələlik məlumat alınmayıb, 55 ölkədən verilən məlumata görə, orada xəstələnənlərin sayı 10-dan çox deyil. Hətta virusun aşkar edildiyi ölkələrdə də o, hər yerdə yayılmayıb. Doktor Tedros belə ölkələri virusun yayılmasına hazır olmağa çağırıb. Söhbət həm əhalinin məlumatlandırılmasından, həm də xəstəxanaların hazır vəziyyətdə olmasından gedir.
Aşkar etmək, qarşısını almaq və müalicə etmək
DST rəhbəri deyib: “Virusu aşkar etmədən ona qalib gəlmək olmaz. Bu o deməkdir ki, virusun hər bir daşıyıcısını aşkar etmək, təcrid etmək, yoxlamaq və müalicə etmək üçün müşahidələri gücləndirmək və beləliklə, virusun ötürülməsi zəncirini qırmaq lazımdır”.
Virusun ötürülməsini məhdudlaşdırmaq və onu məhv etmək
Doktor Tedros qeyd edib ki, COVID-19-un yayılmasını tamamilə dayandırmaq mümkün olmasa belə, onun miqyasını azaltmaq olar. Bunun üçün virus daşıyıcılarını və onlarla kontaktda olmuş insanları aşkar etməyə və karantində yerləşdirməyə çalışmaq lazımdır. Yalnız virusa yoluxmaqda şübhə doğuran bütün insanları yoxlamaq yolu ilə ətrafdakıları, o cümlədən qocalar evlərində yaşayanları qorumaq olar.
Virusa qarşı mübarizənin yeni metodlarını axtarmaq
DST rəhbəri deyib ki, COVID-19-un yeni virus olmasını və bizim qabaqcadan bilinməyən vəziyyətə düşməyimizi nəzərə alaraq işin gedişində öyrənməliyik. O vurğulayıb: “Biz yoluxmanın qarşısını almağın yeni metodlarını tapmalı, insanların həyatını xilas etməli və epidemiyanın nəticələrini minimuma endirməliyik. Hər bir ölkə özünün mənimsədiyi dərsləri bölüşməlidir”.
DST müxtəlif ölkələrin hökumətlərini dəstəkləmək üçün əlindən gələni edir. 57 dövlətə fərdi müdafiə vasitələri göndərilib, daha 28 dövlət növbədədir. 120 ölkə DST xətti ilə laboratoriya avadanlıqları alıb. Təşkilatın ekspertləri tibb işçiləri arasında distant təlim keçirlər. Artıq 176.000 nəfər onlayn kursa yazılıb. Donor ölkələr COVID-19 pandemiyasına qarşı mübarizə üçün Dünya Səhiyyə Təşkilatına ümumilikdə 440 milyon dollar yardım göstərəcəklərini vəd ediblər.
Doktor Tedros bir daha vurğulayıb ki, yalnız səyləri birləşdirməklə yeni virusun öhdəsindən gəlmək olar.
Bölmənin digər xəbərləri
