AZƏRTAC xəbər verir ki, Birləşmiş Ərəb Əmirliklərinin Dubay şəhərində 31 Dekabr - Dünya Azərbaycanlılarının Həmrəyliyi günü münasibətilə bayram tədbiri keçirilmişdir.

Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, bu ölkədə yaşayan soydaşlarımızın iştirakı ilə keçirilən tədbirdə Dubaydakı Azərbaycan Cəmiyyətinin sədri Samir İmanov Dünya Azərbaycanlılarının Həmrəyliyi gününün tarixi əhəmiyyəti barədə danışmışdır.

O diqqətə çatdırmışdır ki, ulu öndər Heydər Əliyevin təşəbbüsü ilə dünyanın müxtəlif ölkələrində yaşayan azərbaycanlıların milli birlik və həmrəylik günü kimi qeyd etdiyi, soydaşlarımızın birliyi və həmrəyliyi ideyasına əsaslanan bu bayramın qayəsi artıq həm bütün dünyada yaşayan soydaşlarımızın düşüncəsinə hakim kəsilmişdir.

Azərbaycan dövlətinin xaricdə yaşayan soydaşlarımızın sosial-iqtisadi maraqlarının müdafiəsi, beynəlxalq konvensiyalarda təsbit olunmuş hüquqlarının qorunması üçün gördüyü tədbirlərdən danışan cəmiyyət sədri qeyd etmişdir ki, ümummilli liderin dünyanın müxtəlif ölkələrində yaşayan soydaşlarımızın azərbaycançılıq ideyası ətrafında birləşdirilməsi və güclü lobbimizin yaradılması siyasətini Prezident İlham Əliyev ugurla davam etdirir. Azərbaycan Prezidenti xaricdə yaşayan hər bir azərbaycanlının maraq və mənafeyinin qorunmasını dövlətin başlıca vəzifəsi hesab edir.

Təbdir iştirakçılarına, həmçinin Dünya Azərbaycanlılarının I və II qurultayları, Azərbaycan və türk diaspor rəhbərlərinin I Forumu və bu tədbirlərdə qəbul olunmuş yekun sənədlər barədə bir daha ətraflı məlumat verilmişdir.

Sonda Xarici Ölkələrdə Yaşayan Azərbaycanlılarla İş üzrə Dövlət Komitəsinin hazırladığı “Biz 50 milyonluq xalqıq” filmi nümayiş etdirilmiş və Azərbaycan milli xörəklərindən ibarət ziyafət verilmişdir.