DÜNYA AVARÇƏKƏNLƏRİ YENİDƏN MİNGƏÇEVİRƏ TOPLAŞACAQLAR
AZƏRTAC xəbər verir ki, Prezident İlham Əliyevin tapşırığı ilə Mingəçevirdəki köhnə avarçəkmə bazasının yerində inşa olunan “Kür” Olimpiya Tədris İdman Kompleksinin tikintisində işlər sürətlə davam etdirilir. Serbiya və Azərbaycanın müştərək təşkilatı olan “Serb-A2” tikinti şirkətinin briqadası tərəfindən inşa edilən kompleksin inzibati binasında hörgü işləri tamamlanmış və hazırda dam örtüyü quraşdırılır, elektrik və suvaq işləri aparılır. Səkkizmərtəbəli mehmanxana binası, idman zalı və 25x50 metr ölçüdə üzgüçülük hovuzunun tikintisində dəmir-beton və hörgü işləri başa çatmaq üzrədir.
Altı hektar sahəni əhatə edən “Kür” Olimpiya Tədris İdman Kompleksində müxtəlif idman növləri, o cümlədən güləş, voleybol, basketbol ilə məşğul olmaq üçün şərait yaradılacaq, məşq zalı, 4 böyük tennis kortu, 50-yə yaxın avarçəkmə qayığının saxlanılması üçün anbarlar, idmançıların soyunub-geyinmə otaqları, duşxanalar inşa ediləcək, avarçəkmə yarışlarını izləyəcək 1500 tamaşaçı üçün oturacaqlar qoyulacaq, hakimlər üçün 35 metr hündürlüyündə qüllə quraşdırılacaqdır.
Tikinti şirkətinin iş icraçısı Elçin Əhmədovun sözlərinə görə, inşaat işlərinə Serbiyadan 80 nəfər, Azərbaycandan 60 nəfər mütəxəssis, inşaatçı və quraşdırıcı cəlb olunmuşdur. Üç aydan sonra işlərin həcminin artması ilə əlaqədar işçilərin sayının təxminən 250-yə çatdırılması nəzərdə tutulur.
Ərazidə tikinti-quraşdırma işlərinə 2007-ci ilin avqustunda başlanmışdır. Kompleks 2010-cu ildə istifadəyə veriləcəkdir.
Bölmənin digər xəbərləri
