Dünya Bankı şəhər infrastrukturunun kommersiya maliyyələşdirilməsi ilə bağlı araşdırma aparıb
Bakı, 20 may, AZƏRTAC
Dünya Bankı inkişaf etməkdə olan ölkələrdə şəhər infrastrukturunun kommersiya maliyyələşdirilməsi problemi ilə bağlı genişmiqyaslı araşdırma aparıb.
AZƏRTAC xəbər verir ki, bu barədə Dünya Bankının nümayəndəsi Roland Vayt Ümumdünya Şəhərsalma Forumunun 13-cü Sessiyası (WUF13) çərçivəsində "Bankçılıq üçün yararlı bələdiyyələr, yaşanacaq şəhərlər" mövzusunda tədbirdə çıxışı zamanı deyib.
“Təxminən 24–25 inkişaf etməkdə olan ölkə var ki, orada tənzimləyici şərtlər və fiskal göstəricilər bələdiyyələrə kommersiya maliyyələşməsinə — istər kreditlər, istərsə də dövlət-özəl tərəfdaşlığı (DÖT) mexanizmləri vasitəsilə — effektiv çıxış imkanı yaradır. Bununla belə, bu ölkələrin heç birində borclanmanın həcmi ÜDM-in təxminən 3 faizini keçmir və əksər dövlətlərdə bu göstərici daha da aşağıdır. Həmçinin qeyd etmək lazımdır ki, bu tendensiya kifayət qədər uzun müddətdir davam edir. Əslində, arxiv məlumatlarının imkan verdiyi qədər geriyə baxsaq görərik ki, aparıcı inkişaf etməkdə olan ölkələrdə (məsələn, Cənubi Afrika, Hindistan, Kolumbiya, Braziliya, Türkiyə) bələdiyyələrin özəl mənbələrdən borclanma aktivliyi heç bir dövrdə ÜDM-in təxminən 2 faizini keçməyib”, - deyə Roland Vayt əlavə edib.
Fotoqraf - Samirə Quliyeva
Bölmənin digər xəbərləri
