DÜNYA ÇEMPİONATLARININ FİNAL MƏRHƏLƏSİNDƏ İŞTİRAK EDƏN KOMANDALARIN SAYINI ARTIRMAMAQ QƏRARA ALINMIŞDIR
AZƏRTAC Bi-Bi-Si-yə istinadla xəbər verir ki, FİFA İcraiyyə Komitəsinin iclasında dünya çempionatlarının final mərhələsində iştirak edən komandaların sayını 32-dən 36-dək artırmamaq qərara alınmışdır. Dünya futbol birinciliyinin islahatını Cənubi Amerika futbol federasiyalarının nümayəndələri təkid edirdilər. Başqaları ilə bərabər FİFA prezidenti Zepp Blatter də bunun əleyhinə çıxmışdır. Cənubi amerikalıların fikrincə, dünya çempionatlarının keçirilməsinin indiki sistemində bu qitə birinciliklərdə kifayət qədər geniş təmsil olunmur. Xatırladaq ki, Yaponiyada və Cənubi Koreyada keçirilmiş dünya çempionatı ərəfəsində FİFA qərar qəbul etmişdi ki, bu birincilikdə qalib gələn komanda seçmə görüşlərində oynamasa, növbəti birinciliyə buraxılmayacaqlar. Söhbət 2006-cı ildə Almaniyada keçiriləcək dünya çempionatından gedir. Beləliklə, Cənubi Amerika braziliyalıların tuta biləcəkləri yerdən məhrum edilmişdir. Qitənin futbol federasiyalarına ağır gələn budur ki, 2006-cı il dünya çempionatında avropalılar 17 komanda ilə təmsil olunduğu halda, Cənubi Amerika futboluna cəmi 4 yer verilib.
Bölmənin digər xəbərləri
