Dünya Şahmat Olimpiadası layihəsinə 300-dən çox könüllü və supervayzer cəlb ediləcək
Bakı, 23 avqust, AZƏRTAC
Könüllülər iş komissiyası cari ilin mart ayından fəaliyyətə başlayıb. Əməliyyat Komitəsinin əlaqələndiriciləri bu işin ilk günlərində qarşıda duran vəzifələrin və planların qrafikini tərtib edib. Komanda həmin qrafik üzrə inamla irəliləyir. Komissiyanın iş prosedurları hazırlanıb, sonrakı bütün addımlar həmin prosedurlara uyğunlaşdırılıb.
Layihəyə 300-dən çox könüllü və supervayzer - Azərbaycanda keçirilən beynəlxalq tədbirlərdə iş təcrübəsinə malik olan gənclərin ən yaxşı nümayəndələri cəlb ediləcək.
Beynəlxalq qrossmeyster, Dünya Şahmat Olimpiadasının əməliyyat fəaliyyəti üzrə rəhbəri Cahangir Ağarəhimov AZƏRTAC-a eksklüziv müsahibəsində deyib: “Heç bir idman tədbiri könüllülərin köməyi olmadan keçirilmir. Şahmat Olimpiadası tarixində bu qədər gəncin həm idman sahəsinə və beynəlxalq atmosferə daxil olmaq, həm də öz köməyini göstərmək arzusunda olması ilk dəfədir. Bu işin belə geniş miqyas alması həm şahmatın sevildiyi, ona hörmət bəslənilən Azərbaycan üçün, həm də bütün dünya üçün şahmat tarixində yeni səhifədir. İndi biz hazırlıq işinin son mərhələsindəyik. Komandamız könüllülər üçün şahmat turniri, intellektual oyun, treninqlər keçirib, müxtəlif yerlərə, Olimpiadanın obyektlərinə səfərlər təşkil edib, bir sıra başqa tədbirlər görüb. İnamla deyə bilərəm ki, biz bütün dünyanın ən yaxşı şahmatçılarını qarşılamağa və Vətənimizin paytaxtını onlara göstərməyə hazırıq”.
Olimpiada ərəfəsində Təşkilat Komitəsi könüllülər üçün treninqlər keçirir. Bu treninqlərdə könüllülərə Dünya Şahmat Olimpiadasının tarixi, habelə Azərbaycanın görkəmli şahmatçıları barədə ətraflı məlumat verilir.
Könüllülər ən mühüm nöqtələrdə işləyəcəklər:
Aeroport - qonaqların qarşılanması, viza prosedurları zamanı kömək, baqajın itirilməsi hallarında kömək və s.
Otellər - qonaqların yerləşdirilməsi, akkreditə kartlarının paylanması, iki həftə ərzində ölkəmizin ərazisində olacaq şahmatçılara və ya Konqres üzvlərinə kömək. Oyunçulara yaxınlıqda yerləşən bütün ticarət mərkəzləri, mağazalar, valyutadəyişmə məntəqələri və restoranlar, habelə Olimpiada dövründə onların iştirak edə biləcəyi mədəni və əyləncə xarakterli bütün tədbirlər haqqında məlumat veriləcək.
Nəqliyyat - layihə müddətində ən mühüm əlaqələndirici məntəqələrdən biridir. Könüllülər qonaqların oteldən Olimpiadanın keçiriləcəyi yerə daşınmasının, açılış və bağlanış mərasimlərinin, digər müvafiq tədbirlərin əlaqələndirilməsi ilə məşğul olacaqlar.
Olimpiadanın keçiriləcəyi yer - “Kristall Hall”. Komandanın əsas hissəsi burada fəaliyyət göstərəcək. Könüllülər həm şahmatçıların, həm də tamaşaçıların qarşılanmasına, akkreditasiya sənədlərinin verilməsinə və ya bununla bağlı hər hansı problemin həllinə, elektron cihazların seçilməsinə, anti-cheating və anti-doping işində hakimlərə, şərhçi zonasında və ya təhlil zonasında işlərə kömək edəcəklər.
Açılış və bağlanış mərasimlərinin keçiriləcəyi məkan - Milli Gimnastika Arenası. Könüllülər burada qonaqları qarşılayacaq, onların yerləşdirilməsinə kömək edəcək, bir sözlə ümumi bayram ab-havası yaradacaqlar.
Nümayəndə heyətləri ilə iş - xüsusi diqqət göstərilməsinə ehtiyacı olan bəzi nümayəndə heyətləri üçün maksimum komfort şərait yaradılması məqsədilə belə nümayəndə heyətlərinin hərəsi ilə iki könüllü işləyəcək. Bu gənclər həm xarici dilləri, həm də jestlər dilini mükəmməl bilirlər.
Paralel fəallıq - Olimpiadanın əsas məqsədlərindən biri insanların, xüsusən gənc nəslin şahmata diqqətini cəlb etməkdir. Bununla əlaqədar, dənizkənarı bulvar ərazisində və “Kristall Hall” ərazisində müxtəlif əyləncəli-maarifçilik proqramları təşkil ediləcək. Bu tədbirlərin keçirilməsi də könüllülərə həvalə edilib.
Konqres - 30 nəfər ən yaxşı gənc könüllü tərcüməçi, filoloq və diplomat Konqresin işinə kömək edəcək. Onların vəzifəsi müvafiq materiallar hazırlamaq və bütün prosesi əlaqələndirməkdir.
Mətbuat və media - bu könüllülərin işinin əsas məqsədi jurnalistlərə sadəcə kömək etmək deyil, həm də mətnlərlə, tərcümələrlə işləmək, lazımi mənbələri axtarıb tapmaqdır.
Könüllülərin hazırlanmasının birinci mərhələsi artıq başa çatıb. Müvafiq treninqlər keçirilib, gənclərə şahmatın tarixi barədə məlumat, Olimpiadaya aid faktlar təqdim olunub, onlar dünyanın və Azərbaycanın ən yaxşı şahmatçıları ilə tanış edilib. Könüllülərin mövqeyindən asılı olaraq onların konkret vəzifələri izah edilib. Hazırda məşqlər keçirilir, könüllülərin öz vəzifələrini yerinə yetirəcəyi yerlərə səfərlər təşkil edilir. Dünən könüllülər açılış və bağlanış mərasimlərinin keçiriləcəyi Milli Gimnastika Arenasında olublar. Sabah onlar bütün otellərə baş çəkəcək, avqustun 25-də - könüllülər üçün ən əlamətdar gündə isə Şahmat Olimpiadasının ürəyi sayılan “Kristall Hall”da treninq təşkil ediləcək. Bu ayın sonunda aeroport üzrə könüllülər komandası da işə başlayacaq.
Bölmənin digər xəbərləri
