DÜNYA SƏHİYYƏ TƏŞKİLATININ YENİ TƏŞƏBBÜSÜ

04.02.2004 [10:56]
Çap et
A⁺ A^-

Dünya Səhiyyə Təşkilatı (DST) siqaret çəkməklə mübarizə ilə bağlı yeni təşəbbüs irəli sürmüşdür. DST-nin Bakı nümayəndəliyindən AZƏRTAC-ın müxbirinə bildirmişlər ki, həkimlərin, əczaçıların, stomatoloqların və digər tibb mütəxəssislərinin dünyanın bir çox ölkələrindəki peşəkar assosiasiyaları nümayəndələrinin Cenevrədə keçirilmiş görüşündə səhiyyə işçilərini nümunə göstərərək, siqaret çəkməyi azaltmağa çağıran qərar qəbul olunmuşdur.

Görüş zamanı səhiyyə işçilərinin DST-nin tütünə nəzarətə dair Çərçivə Konvensiyasının öz ölkələri tərəfindən imzalanması prosesində iştirakının gücləndirilməsi barədə də razılıq əldə edilmişdir.

Xatırladaq ki, 2003-cü ilin mayında qəbul olunmuş bu Konvensiya vergilərin və qiymətlərin artırılması, qeyri-qanuni ticarətin qarşısının alınması, qablaşdırma, reklam kimi tütünlə bağlı məsələlərdə standartları müəyyənləşdirir. Qəbul edildiyi vaxtdan Konvensiyanı 87 ölkə və Avropa Birliyi imzalamış, 6 ölkə isə bu sənədi ratifikasiya etmişdir. Konvensiya 2004-cü il iyunun 29-dək BMT-nin iqamətgahında imzalanmaq üçün açıq olacaqdır.

DÜNYA SƏHİYYƏ TƏŞKİLATININ YENİ TƏŞƏBBÜSÜ

MÜƏLLİFLƏ ƏLAQƏ

Bölmənin digər xəbərləri