Dünyada silah satışından əldə edilən gəlir 3,5 faiz azalıb
Bakı, 4 dekabr, AZƏRTAC
Dünyanın aparıcı silah istehsalçıları tələbatın sürətlə artmasına baxmayaraq, 2022-ci ildə istehsal həcmini əhəmiyyətli dərəcədə artıra bilməyib.
AZƏRTAC xəbər verir ki, bu barədə Stokholm Sülh Problemlərinin Tədqiqatı İnstitutunun məlumatında deyilir.
“Tələbin kəskin artmasına baxmayaraq, silah sənayesinin 100 ən böyük kompaniyasının 2022-ci ildə silah satışından və hərbi xidmətlərdən əldə etdiyi gəlir 597 milyard dollar təşkil edib ki, bu da 2021-ci illə müqayisədə 3,5 faiz azdır”, - deyə sənəddə bildirilir.
İnstitutun məlumatına görə, yeni sifarişlərə baxmayaraq, Amerika və Avropanın silah kompaniyaları Ukraynadakı vəziyyət səbəbindən kəskinləşən işçi qüvvəsi çatışmazlığı, qiymət artımı və məhsul tədarükündə fasilələr səbəbindən istehsal həcmini əhəmiyyətli dərəcədə artıra bilməyiblər.
Ekspertlərin sözlərinə görə, kompaniyaların çoxu istehsalı intensiv müharibəyə uyğunlaşdırmaqda çətinlik çəkib. Bununla belə, yeni müqavilələrin imzalanması 2023-cü ildə və sonrakı dövrdə silah istehsalçılarına böyük gəlir gətirə bilər.
2022-ci ildə ən iri yüz kompaniya arasında yer alan ABŞ-ın 42 kompaniyası 7,9 faiz az - 302 milyard dollar qazanc əldə edib. Lakin siyahıdakı kompaniyaların əldə etdiyi gəlirin 51 faizi məhz onların payına düşüb. Avropanın 26 kompaniyası isə ötən il ümumilikdə 121 milyard dollar qazana bilib.
Asiya-Sakit Okean regionu ölkələrinə məxsus 22 kompaniyanın ümumi gəliri isə 3,1 faiz artaraq 134 milyard dollar təşkil edib. Silah istehsalı ilə məşğul olan Çin kompaniyaları 2022-ci ildə siyahıda ikinci yeri tutub: gəlirin 18 faizi məhz onlara məxsusdur.
Ötən il regional gəlirdə faiz nisbətində ən böyük artım Türkiyənin hesabına Yaxın Şərqdə müşahidə olunub.
Bölmənin digər xəbərləri
