Ədəbiyyat İnstitutunda dünya şairlərinin iştirakı ilə “Şuşaya salam” adlı tədbir keçirilib
Bakı, 19 iyul, AZƏRTAC
Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda dünya şairlərinin iştirakı ilə “Şuşaya salam” adlı tədbir keçirilib.
AMEA-dan AZƏRTAC-a bildirilib ki, Türkiyə, Macarıstan, Moldova, Belarus, Qazaxıstan və Özbəkistandan gəlmiş yazarların iştirak etdiyi tədbirdə “Şuşaya salam”, “Şeir məni yazır”, “Brejnevin maskaları” kitablarının da təqdimatı olub.
Giriş sözü ilə çıxış edən AMEA-nın prezidenti, Ədəbiyyat İnstitutunun direktoru akademik İsa Həbibbəyli 91 yaşlı institutda qonaqları salamlamaqdan məmnunluğunu ifadə edib. Ədəbiyyat İnstitutu haqqında məlumat verən akademik İsa Həbibbəyli bu elm ocağında Azərbaycan ədəbiyyatı ilə bərabər, dünya və türk xalqları ədəbiyyatlarını öyrənən şöbələr olduğunu da diqqətə çatdırıb. Eyni zamanda, Əlişir Nəvai, Məxtimqulu Fəraqi, Mehmet Akif Ərsoy mərkəzlərinin də fəaliyyət göstərdiyini bildirib. İnstituta aid elmi nəşrlər haqqında qonaqları məlumatlandıran akademik İsa Həbibbəyli ədəbiyyatşünaslığı öyrənən jurnallardan da bəhs edib. “Müqayisəli ədəbiyyatşünaslıq” jurnalının bir sayının özbək ədəbiyyatına, bir sayının da Abay Kunanbayevə həsr edildiyin deyib. İnstitutda Çingiz Aytmatovun tədqiq edilməsini, Yunus Əmrənin Azərbaycan dilində çap edilməsini xatırladan akademik İsa Həbibbəyli Məlahət Qədirova tərəfindən Belarus ədəbiyyatına aid üç cilddə antologiyanın hazırlandığını qeyd edib. Macar ədəbiyyatına aid dissertasiya yazıldığını, Macar ədəbiyyatı tarixi kitabının Azərbaycan dilinə çevrildiyini, yaxın günlərdə çap ediləcəyini bildirib. AMEA-nın Macarıstan Elmlər Akademiyası ilə əlaqələrin qurulmasında maraqlı olduğunu, Akademiyanın 80 illik yubileyinə Macarıstan Akademiyasının prezidentini də dəvət etdiyini söyləyib.
Türkiyə ədəbiyyatının Azərbaycanın bütün elm mərkəzlərində, xüsusilə Akademiyada hərtərəfli öyrənildiyini söyləyən akademik İsa Həbibbəyli AMEA-nın dünya xalqları ilə elmi əlaqələr formalaşdırdığını da ifadə edib. Dünya ədəbiyyatı nümunələrinin tərcümə və təbliği sahəsində Səlim Babullaoğlunun xüsusi rolunu da vurğulayıb.
Sonra Azərbaycan Yazıçılar Birliyinin (AYB) beynəlxalq əlaqələr və tərcümə məsələləri üzrə katibi, şair, esseist Səlim Babullaoğlu çıxış edib. O, çıxışında “Şuşa İli”ndə həyata keçirilən “Şuşaya salam” layihəsi haqqında məlumat verib. Layihədə 32 ölkənin şairlərinə müraciət edildiyini bildirib. Qonaqların hər biri haqqında iştirakçıları məlumatlandıran Səlim Babullaoğlu Nikolae Spetarunun “Brejnevin maskaları” romanının, Atilla Balaşın “Şeir məni yazır” kitabının tərcümə olunaraq Azərbaycan oxucusuna təqdim edilməsindən danışıb.
Qonaqlardan macar şairi Atilla Balaş, moldovalı Nikolae Spetaru, Türkiyə yazarları Adnan Özer, Barış Bahar, Belarus şairi Mariya Kobets, qazax alim və şair Kadırbek Kunıpiyaulı, özbək şair Adhambek Alimbekov ana dillərində şeirlərini səsləndiriblər. Şeirləri Azərbaycan dilində Səlim Babullaoğlu təqdim edib.
Tədbirdə filologiya elmləri doktoru Abuzər Bağırov vətənpərvərlik mövzusunda şeirini oxuyub, AYB Gənclər şurasının sədri Fərid Hüseyn Türk Mədəniyyəti və İrsi Fondunun həyata keçirdiyi layihələrdən söz açıb.
Sonda qonaqlara Ədəbiyyat İnstitutunun nəşrlərindən hədiyyə edilib, xatirə şəkilləri çəkdirilib.
Bölmənin digər xəbərləri
