Əfv Sərəncamı Azərbaycan Prezidentinin humanist mövqeyi və prinsipial siyasi iradəsinin təzahürüdür
Bakı, 11 may, AZƏRTAC
Humanizm bəşər tarixinin hərəkətverici qüvvəsi kimi yaddaşlara həkk olunub. İnsanların əsas hüquqlarından sayılan yaşamaq və sosial həyatın bir parçası olmaq imkanlarını həyata keçirmək dövlətin ali vəzifələrinə daxildir. Prezident İlham Əliyev Ümummilli Lider Heydər Əliyevin 100 illik yubileyi münasibətilə ali dəyərlərdən irəli gələrək məhkum olunmuş bir sıra şəxslərin Əfv olunması haqqında Sərəncam imzaladı. Humanizm prinsiplərini rəhbər tutan Prezident İlham Əliyev müstəqillik tariximizin ən böyük Əfv Sərəncamını təsdiqlədi. Əminliklə qeyd edə bilərik ki, Azərbaycan Prezidentinin yürütdüyü siyasətin mərkəzində vətəndaşların hüquq və azadlıqlarının qorunmasının vacib xətt olduğu danılmaz faktdır.
Bu fikirləri AZƏRTAC-a açıqlamasında politoloq Tural Əliyev söyləyib.
O qeyd edib ki, əfv komissiyası həbsxana rəhbərliyi ilə birgə siyahıları hazırlayarkən ən xırda detallar belə nəzərə alınır, psixoloji durum və məsuliyyətli davranış əsas götürülür.
Cinayət törətmiş şəxslərin böyük əksəriyyəti əməllərinə görə peşman olduqlarını bildirirlər. Çünki həbsxana həm də cinayət törətmiş insanların islah olunduğu bir yerdir. Əfv olunmuş şəxslər cəmiyyətə yenidən qayıtmaq üçün bir şans qazanırlar. Digər tərəfdən baxdıqda isə azadlığa qovuşmuş insanlar başqalarının cinayətə bulaşmamasının qarşısını kəsə bilərlər. Belə ki, onlar da öz təcrübələri əsasında azadlığın necə bir meyar olduğunu və qanunazidd əməllərin təhlükəli tərəflərini aşılamaqla insanları cinayətlərdən yayındırmaq imkanı qazanırlar.
“Əfv Sərəncamı Azərbaycan Prezidenti İlham Əliyevin humanist mövqeyi, prinsipial siyasi iradəsinin məntiqi nəticəsi kimi qiymətləndirilir və xalqımız tərəfindən minnətdarlıq hissi ilə qarşılanır. Yüzlərlə ailənin sevincinə səbəb olan bu hüquqi akt özündə bir çox cəhətləri birləşdirir. Belə ki, sönmüş ümidlərə işıq gəlməsi, ailə bütövlüyü, vətəndaş cəmiyyətinin dövlətə inamının artması və qüvvəyə minmiş qanunların ədalətə söykənməsi ictimai təzahürləri kompleks şəkildə səciyyələndirir.
Dövlət və vətəndaş münasibətləri öhdəliklər əsasında formalaşır. Dövlətin humanizm siyasəti vətəndaşları ruhlandırır, arxasında o gücü hiss edən insanlar isə məsuliyyətli davranmağa daha çox meyil edirlər. Nəticədə vətəndaş cəmiyyətinin əsasını təşkil edən müxtəlif qruplar dövlətin inkişafına dəstək olurlar. Azərbaycan dövləti hər zaman çalışır ki, vətəndaşlar sosial, iqtisadi hüquqların əhatəsində rahat və təhlükəsiz şəkildə yaşasınlar. Azərbaycan Prezidenti məhz bu amillərin həyata keçməsinə çalışır. Dövlətimizin başçısı hüququn aliliyinin, dövlətçilik ənənələrinin, tarixə bağlılıq ideyasının qorunub saxlanılması və gələcək nəsillərə ötürülməsi kimi missiyanı uğurla davam etdirir. Prezident İlham Əliyevin rəhbərliyi dönəmində imzalanmış humanizm aktlarının, əfv sərəncamlarının qayəsi hakimiyyətin məqsəd və vəzifələrini müəyyənləşdirir.
Bölmənin digər xəbərləri
