Ekoloji normalara əməl etməyən iri müəssisə və təşkilatlar cərimələnmişlər
Bakı, 27 dekabr (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühitin Mühafizəsi Departamentinin əməkdaşları tərəfindən 2011-ci ilin keçən dövrü ərzində iri müəssisə və təşkilatlarda aparılmış araşdırmaların nəticələri açıqlanmışdır.
Nazirliyin mətbuat xidmətindən AZƏRTAC-a bildirmişlər ki, araşdırma zamanı bir çox müəssisələrdə ekoloji norma və qaydaların pozulması üzə çıxmışdır. Atmosfer havasına və ətraf əraziyə atdıqları zərərli maddələrə görə Azərbaycan Respublikası Dövlət Neft Şirkətinin neft və qazçıxarma idarələrinə 21 min 420 manat, “Qarasu” əməliyyat şirkətinə 7 min 500 manat, Kompleks Qazma İşləri Trestinin Abşeron Qazma İşləri İdarəsinə 12 min 490 manat ödəmələr tətbiq olunmuşdur.
Bundan başqa, Xəzər dənizinə istehsalat sularının axıdılmasına görə “Azneft” İstehsalat Birliyinə 35 min 730 manat ödəmə tətbiq olunmuş, ondan 11 min 730 manatın ödənilməsi təmin edilmişdir. Ətraf mühitə atılan zərərli maddələrə görə Dərin Özüllər Zavoduna 3 min 83 manat, Geofizika və Geologiya idarələrinə 1032 manat, Qaz Emalı Zavoduna 2 min 926 manat, Neft Kəmərləri İdarəsinə 5 min 128 manat, Marketinq və İqtisadi Əməliyyatlar İdarəsinə 3 min 920 manat, Sosial İnkişaf İdarəsinə 5 min 29 manat, Qaraçuxur İriləşdirilmiş Neft Mədəninə 4 min 232 manat, Dalma Qurğularının Təmiri və Kirayəsi üzrə Elm İstehsalat Müəssisəsinə 3 min 30 manat, “Xəzərdənizneftdonanma” İdarəsinə 4 min 779 manat, “SOCAR-AQŞ” MMC-yə 2 min 209 manat, “Baku Stell Company” MMC-yə 2 min 857,3 manat, “Qafqaz Trans Services” MMC-yə 3 min 57,5 manat, “Azərikimya” İB-nin Sumqayıt şəhərində fəaliyyət göstərən 5 müəssisəsinə 4 min 170 manat məbləğində ödəmə tətbiq edilmiş və müəssisələr tərəfindən vəsaitin ödənilməsi təmin olunmuşdur.
Su mühitinə atılan zərərli maddələrə görə “Neftçala Operating Company LTD”, “Suraxanı Oil Operating Company S.A.” şirkətləri, “AzGerneft” MMC və axıdılan suların tərkibində neft məhsullarının miqdarına görə “Şirvan Operating Company Limited”, “Abşeron Operating Company Limited” şirkətləri cərimələnmişlər.
Bundan əlavə, qazma şlamlarının düzgün yerləşdirilməməsinə və tullantı sularının tərkibində neft məhsullarının çoxluğuna görə “Binəqədi Oil Operating Company S.A.” şirkətinə 9 min 250 manat məbləğində ödəmə tətbiq edilmişdir.
Ətraf mühitə atılan tullantılara görə “LUKoil-Azərbaycan” QSC-yə 876,4 manat, “Azpetrol LTD” MMC-yə isə 1470,8 manat məbləğində ödəmə tətbiq edilmiş və ödənilməsi təmin olunmuşdur.
Ətraf mühitin mühafizəsi qanunvericiliyinin tələblərini ciddi şəkildə pozduqlarına, qurğu və avadanlıqlarda formalaşan tullantı sularını birbaşa Xəzər dənizinə axıtdıqlarına görə hüquqi şəxs qismində Xəzər Dəniz Gəmiçiliyinin İ.Allahverdiyev adına Gəmi Təmiri Zavodu 8 min manat, “Xəzər Dəniz Liman Xidməti” MMC isə 10 min manat məbləğində cərimə olunmuşdur.
Xəzər dənizinin Azərbaycan sektorunda yerləşən neft yataqlarının platformalarında yaranan məişət-təsərrüfat və istehsalat yönümlü qarışıq mənşəli tullantı sularının Xəzər dənizinə axıdılmasına, həmçinin qazma şlamının düzgün utilizasiya edilməməsinə görə “bp” şirkətinə konkret faktlar üzrə iddialar qaldırılmışdır. Hazırda bununla bağlı müzakirələr aparılır.
Eyni zamanda, “Bahar Enerji” Əməliyyat Şirkətinin fəaliyyət zonasında ətraf mühitin mühafizəsi sahəsində mövcud qanunvericiliyin tələblərinə riayət olunması vəziyyəti araşdırılmışdır. Su hövzələrinin çirkləndirilməsinə və bərk tullantıların düzgün idarə edilməməsinə görə müəssisə inzibati qaydada hüquqi şəxs qismində 10 min manat məbləğində cərimə edilmişdir. Cərimənin ödənilməsi üçün məhkəmə icra orqanı tərəfindən şirkətə qanunvericiliyə uyğun göstəriş verilmişdir.
Çatışmazlıqların aradan qaldırılması məqsədi ilə ETSN-in Ətraf Mühitin Mühafizəsi Departamentinin əməkdaşları tərəfindən müəssisə rəhbərliklərinə icrası məcburi olan məcburi göstərişlər verilmişdir.
Bölmənin digər xəbərləri
