Ekspert: Ekspres avtobusların sayının artırılması və digər potensial marşrutların təhlil edilməsi vacibdir
Bakı, 1 sentyabr, AZƏRTAC
Şəhərin mərkəzi hissələrində, xüsusilə piyada infrastrukturunun yaxşılaşdırılması ilə bağlı layihələrin təxirə salınmadan və sürətlə həyata keçirilməsi vacibdir.
Bu barədə AZƏRTAC-a açıqlamasında nəqliyyat eksperti Rauf Ağamirzəyev deyib.
Ekspert bildirib ki, qısa piyada marşrutlarının formalaşdırılması, zolaqların və işıqforla tənzimlənən piyada keçidlərinin sayının artırılması bu baxımdan mühüm addımlardır. Məsələn, “28 May” və “Nizami” stansiyaları arasındakı məsafə piyada hərəkəti üçün kifayət qədər münasibdir: “Aydındır ki, avtobus metroya rəqib ola bilməz. Fikrimcə, müəyyən təsirlər mümkündür, lakin bu təsirləri minimuma endirmək üçün dövlət proqramında nəzərdə tutulan və şəhər mobilliyi baxımından ciddi alternativ yarada biləcək bəzi layihələrin icrasını sürətləndirmək lazımdır. İlk növbədə, dəmir yolu əlaqələrinin inkişaf etdirilməsi vacibdir. “Dərnəgül” dayanacağının “Koroğlu” dayanacağı ilə Bağırov yolötürücüsü üzərindən əlaqələndirilməsi, eləcə də Keşlə-Böyükşor istiqamətində sürətli sərnişindaşımanın təşkili üçün dəmir yolu xəttinin tikintisinin tamamlanması mühüm əhəmiyyət daşıyır. Hazırda həmin ərazidə yükdaşıma həyata keçirilir. Bildiyim qədəri ilə, sərnişindaşıma üçün nəzərdə tutulan təxminən 2 kilometrlik sahənin tikintisinin 50 faizi artıq icra olunub. Bu layihənin sürətlə tamamlanması şəhər mobilliyi üçün ciddi alternativ yarada bilər”.
R.Ağamirzəyev qeyd edib ki, bundan əlavə, Abşeron dairəvi dəmir yolu xəttinin imkanlarından daha səmərəli istifadə etməklə Sumqayıt, Xırdalan və Bakı arasında sərnişindaşımanı intensivləşdirmək mümkündür. Şimal-qərbdən şərq istiqamətində sərnişin axınının dəmir yoluna yönəldilməsi həm bu nəqliyyat növündə intensivliyi artıracaq, həm də metronun “28 May”, “20 Yanvar” və “Koroğlu” stansiyalarında sərnişin sıxlığının azalmasına birbaşa təsir göstərəcək: “Bütün bunlar şəhər sakinlərinin bu günə qədər formalaşmış nəqliyyat vərdişlərinin dəyişməsinə də təsir göstərəcək. İstər avtomobildən, istərsə də ictimai nəqliyyatın müxtəlif növlərindən istifadə edən insanların davranışları yeni şəraitə uyğun olaraq dəyişəcək. Müvafiq imkanlar yaradıldıqca insanlar müəyyən məsafələri daha çox piyada qət edəcək, həmçinin şəhərin bir hissəsindən digərinə ənənəvi istiqamətlərlə yanaşı, yeni marşrut və nəqliyyat imkanlarından da istifadə edəcəklər. Ekspres avtobuslara gəldikdə isə onların sayının artırılması, xüsusilə “Neftçilər”–“Elmlər Akademiyası” istiqamətinin və digər potensial marşrutların təhlil edilməsi vacibdir”.
“Digər mühüm məsələ avtobuslarda hər qapıda validatorların quraşdırılmasıdır. Sevindirici haldır ki, bununla bağlı artıq praktiki addımlar atılmağa başlanılıb. Hər qapıdan sərnişinin minib-düşməsinə imkan yaradılmalı, bir istiqamətdən minmə, digər istiqamətdən isə düşmə prinsipi tətbiq olunmalıdır. Bu, avtobusların dayanacaqlarda tranzit vaxtının azalmasına və hərəkət intervalının optimallaşdırılmasına imkan verə bilər. Çünki sərnişinlərin yalnız bir qapıya yönləndirilməsi növbələrin yaranmasına, nəticədə isə avtobusların dayanacaqda daha çox vaxt itirməsinə və marşrut üzrə hərəkət intervalının uzanmasına səbəb olur. Problemi sərnişinlərə növbəyə əməl etmələri ilə bağlı çağırışlar etməklə deyil, sistemin özünü daha səmərəli təşkil etməklə həll etmək lazımdır. Hər qapıda validatorların quraşdırılması bu məsələnin həllinə imkan verər və eyni zamanda sürücünü ödənişə nəzarət funksiyasından azad etmək lazımdır. Sürücünün əsas vəzifəsi sərnişinləri rahat və təhlükəsiz şəkildə mənzil başına çatdırmaqdır. Ödənişlərin həyata keçirilib-keçirilməməsinə nəzarət isə dünyada tətbiq olunan praktikaya uyğun olaraq xüsusi nəzarətçilər tərəfindən həyata keçirilə bilər. Belə nəzarətçilər xüsusi avadanlıq vasitəsilə sərnişinin ödəniş edib-etmədiyini yoxlaya bilərlər. Sərnişin kartla və ya NFC vasitəsilə ödəniş etdikdə həmin məlumat xüsusi cihaz vasitəsilə yoxlanılır. Ödəniş faktı təsdiqlənmədikdə isə müvafiq inzibati tədbir görülür”, - deyə ekspert əlavə edib.
Bölmənin digər xəbərləri
