Ekspert: Hərbi sahədə əməkdaşlıq Azərbaycan və Türkiyənin təhlükəsizliyi baxımdan mühüm addımdır
Bakı, 28 avqust, AZƏRTAC
Azərbaycan və Türkiyə arasında hərbi strateji müttəfiqlik səviyyəsinə qədər yüksəlmiş əməkdaşlıq mövcuddur. İki dövlət arasındakı əlaqələrin daha da gücləndirilməsi və hərbi sahədə əlaqələrin inkişafı daim prioritet məsələ olaraq qalmaqdadır. Hər iki ölkənin liderlərinin iki il əvvəl imzaladığı Şuşa bəyannaməsi bunu bir daha sübut edir. Hazırda bu əməkdaşlıq çox yüksək səviyyədə davam etməkdədir. Türkiyənin milli müdafiə naziri Yaşar Gülər və baş qərargah rəisi Metin Gürakın Azərbaycana səfəri və Ali Baş Komandan, Prezident İlham Əliyev tərəfindən ən yüksək səviyyədə qəbul edilməsi və danışıqların aparılması bir daha iki ölkə arasında hərbi sahədə əməkdaşlığın hansı səviyyədə olduğundan xəbər verir.
Bu fikirləri AZƏRTAC-a açıqlamasında hərbi ekspert Azər Bayramov söyləyib.
Hərbi ekspert bildirib ki, Yaşar Gülərin Türkiyə Silahlı Qüvvələrinin baş qərargah rəisi kimi xidmət dövründə də Azərbaycanla çox sıx əlaqələr mövcud olub və hazırda bunu müdafiə naziri kimi davam etdirir. Türkiyənin müdafiə sistemində Azərbaycanla daha dərin əməkdaşlığı var və regiondakı hadisələrə daha yaxşı bələd olan biri ilə bu səviyyədə görüşün keçirilməsi və əməkdaşlığın davam etdirilməsi üçün müzakirələrin aparılması birbaşa Azərbaycan Silahlı Qüvvələri üçün də böyük üstünlük yaradır: “Nəzərə almalıyıq ki, hazırda dünyanın aparıcı güclərindən hesab edilən və eyni zamanda NATO-da ikinci yerdə olan Türkiyə Silahlı Qüvvələrinin təcrübəsindən yararlanmaqda mütləq şəkildə fayda var. Biz buna ötən 30 il ərzində, son kulminasiya nöqtəsinə isə İkinci Qarabağ müharibəsində birbaşa şahid olduq. Türkiyə yeganə dövlətdir ki, müdafiə naziri və baş qərargah rəisi Ali Baş Komandan tərəfindən qəbul edilir. Bu, bir çox mühüm məsələlərdə birbaşa olaraq hərbi sahədə görüləcək işlərin perspektivləri barədə danışıqların aparılmasının vacibliyinin göstəricisidir. Əlbəttə, regionda və qlobal səviyyədə Azərbaycan və Türkiyə hərbi əməkdaşlığı öz sözünü deməkdədir. Ölkələr arasında hərbi əməkdaşlıq və strateji müttəfiqlik çərçivəsində hərbi təlimlərin keçirilməsini, hətta bir çox dövlətlərin maraq göstərərək həmin təlimlərdə iştirak etməsini iki qardaş ölkə arasındakı bağların hansı səviyyədə olması və eyni zamanda, qoşunların öz döyüş təcrübəsinin artırılmasına birbaşa xidmət etdiyinin göstəricisi kimi qiymətləndirmək olar. Hazırda regionumuzda geosiyasi olaraq baş verən proseslərə nəzər saldıqda deyə bilərik ki, Azərbaycan və Türkiyə hərbi strateji müttəfiqliyi hər iki ölkənin təhlükəsizlik sahəsində zəmanətinin göstəricisidir. İnanırıq ki, gələcəkdə də hərbi əməkdaşlıq daha da güclənəcək. Burada təkcə müdafiə sistemində deyil, eyni zamanda, müdafiə sənayesi sahəsində də əməkdaşlığın mövcudluğunu da qeyd etməliyik. Bunun da gələcəkdə Azərbaycanı müdafiə sənayesi sahəsində daha da irəli aparacağına ümidvarıq.
Qeyd etmək yerinə düşər ki, Türkiyə və Azərbaycan arasında müdafiə sənayesi sahəsində imzalanmış bir çox müqavilələrə əsasən, bir neçə adda hərbi təyinatlı məhsulların istehsalı davam etdirilir. Qardaş ölkənin hərbi təyyarələrinin istehsalında da Azərbaycan-Türkiyə müştərək fəaliyyəti mövcuddur. Ümumilikdə, hərbi sahədə əməkdaşlıq Azərbaycan, eyni zamanda, Türkiyənin təhlükəsizliyi baxımdan mühüm addımdır. Eyni zamanda, milli maraqlarımızın, dövlətimizin qorunmasında əsas aparıcı meyarlardan biridir”.
Bölmənin digər xəbərləri
