SİYASƏT
Əl-Asumi: Ərəb Parlamenti Qoşulmama Hərəkatı Parlament Şəbəkəsi ilə əlaqələrə böyük əhəmiyyət verir
Bakı, 14 may, AZƏRTAC
Milli Məclisin sədri Sahibə Qafarova mayın 14-də ölkəmizdə səfərdə olan Ərəb Parlamentinin sədri Adel bin Abdul Rahman Əl-Asumi ilə görüşüb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, görüşdə Sahibə Qafarova qonağa mayın 16-da keçiriləcək və Azərbaycan xalqının Ümummilli Lideri Heydər Əliyevin 100 illiyinə həsr olunmuş Azərbaycan Respublikası Milli Məclisinin xüsusi iclası haqqında məlumat verib. O müasir müstəqil Azərbaycan dövlətinin banisi və memarı Ulu Öndər Heydər Əliyevin bütün dövrlərdə xalqımıza ləyaqətlə xidmət etdiyini, Azərbaycanın müstəqilliyinin əbədiliyini təmin etdiyini diqqətə çatdırıb. Bildirilib ki, bu gün Azərbaycan Heydər Əliyev siyasətinə və ideyalarına sadiq qalan Prezident İlham Əliyevin rəhbərliyi ilə uğurlu inkişafını davam etdirir.
Azərbaycanın ərəb ölkələri ilə əlaqələrinin hərtərəfli genişləndirilməsinə, o cümlədən Ərəb Dövlətləri Liqası ilə əməkdaşlığın inkişafına önəm verdiyini bildirən Milli Məclisin sədri qeyd edib ki, ölkəmizin Ərəb ölkələri ilə münasibətlərinin əsası Ulu Öndər Heydər Əliyev tərəfindən qoyulub və bu münasibətlər hazırda Prezident İlham Əliyevin rəhbərliyi ilə uğurla davam etdirilir.
S.Qafarova Milli Məclisin Ərəb Dövlətləri Liqasının qanunverici orqanı olan Ərəb Parlamenti ilə əməkdaşlığın inkişafında xüsusilə maraqlı olduğunu qeyd edib.
Milli Məclisin sədri, həmçinin Azərbaycanın işğaldan azad olunmuş ərazilərində həyata keçirilən genişmiqyaslı bərpa və quruculuq işləri barədə də geniş məlumat verib.
Ərəb Parlamentinin sədri Adel bin Abdul Rahman Əl-Asumi tədbirin əhəmiyyəti barədə fikirlərini bildirib, rəhbərlik etdiyi təşkilatın Azərbaycan Milli Məclisi ilə əlaqələrə əhəmiyyət verdiyini, Ərəb Parlamentinə üzv dövlətlərin Azərbaycanla uğurlu əlaqələrə malik olduğunu qeyd edib. O, həmçinin Azərbaycanın Qoşulmama Hərəkatına uğurlu sədrliyini yüksək qiymətləndirib. Adel Əl-Asumi ölkəmizin təşəbbüsü ilə yaradılan təşkilatın Parlament Şəbəkəsinin qısa vaxtda böyük işlər gördüyünü diqqətə çatdırıb. Vurğulanıb ki, bu, Azərbaycanın uğurlu parlament diplomatiyasının göstəricisidir. O, Ərəb Parlamentinin Qoşulmama Hərəkatı Parlament Şəbəkəsi ilə əlaqələrə böyük əhəmiyyət verdiyini bildirib.
Ərəb Parlamentinin sədri paytaxt Bakının və ölkəmizin hərtərəfli inkişafının onda xoş təəssüratlar yaratdığını bildirib. Əlavə edilib ki, qazanılan nailiyyətlər Azərbaycan hökumətinin uğurlu fəaliyyətini təsdiqləyir.
Görüşdə qarşılıqlı maraq doğuran digər məsələlər barədə də fikir mübadiləsi aparılıb.