Əli Əkbər Vilayəti: İran Qərblə əməkdaşlığa açıqdır
Bakı, 28 oktyabr, AZƏRTAC
İran səmimi münasibət qurmaq istəyən Qərb dövlətləri ilə dialoqa hazırdır.
AZƏRTAC xəbər verir ki, bunu İranın ali dini lideri Ayətullah Əli Xameneinin müşaviri Əli Əkbər Vilayəti “Financial Times” qəzetinə müsahibəsində deyib.
“İran İslam Respublikası səmimi münasibət qurmaq istəyən, onun suverenliyinə hörmət edən və bizimlə bərabərhüquqlu tərəf kimi danışan istənilən Qərb dövləti ilə əməkdaşlığa açıqdır”, - deyə Əli Əkbər Vilayəti bildirib.
Nəşrin məlumatına görə, İran liderinin müşavirinin bəyanatı İsrailin İrana hücumundan bir gün sonra - oktyabrın 27-də səslənib.
“Biz digər ölkələrlə münasibətləri balanslaşdırmağa çalışırıq, Avropa, Asiya və Afrikanın istənilən dövləti ilə dostluğu alqışlayırıq”, - deyə siyasətçi əlavə edib.
O, həmçinin vurğulayıb ki, Tehran “ABŞ-ın xoş niyyətinə inanmır”.
İranda çalışan Qərb diplomatlarının sözlərinə görə, islahatçı Məsud Pezeşkianın prezident seçilməsindən sonra bir sıra yerli siyasətçilər Qərblə dialoq qurmaq və nüvə proqramı ilə bağlı ABŞ-la danışıqları bərpa etmək istəyirlər. Buna baxmayaraq, İranın xarici siyasətində heç bir əsaslı dəyişiklik baş verməyib.
Bölmənin digər xəbərləri
