Emin Hüseynov: Azad olunmuş ərazilər yeni idarəçilik sistemi əsasında bərpa olunur
Bakı, 3 noyabr, AZƏRTAC
Azərbaycan Ordusu 30 illik həsrətdən sonra tarixi Qələbə qazanaraq torpaqlarını işğaldan azad edib. Hazırda azad olunmuş torpaqlarda dağıdılmış ərazilər yeni idarəçilik sistemi əsasında bərpa edilir.
AZƏRTAC xəbər verir ki, bunu Azərbaycan Respublikasının Birinci vitse-prezidentinin köməkçisi, Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov noyabrın 3-də Bakıda “Prezident İlham Əliyevin rəhbərliyi ilə postkonflikt quruculuğu modeli” mövzusunda keçirilən tədbirdə çıxışı zamanı bildirib.
Xüsusi nümayəndə qeyd edib ki, torpaqlarımız işğaldan azad olunduqdan sonra dayanıqlı məskunlaşmanın təmin edilməsi əsas məsələlərdən biridir. Diqqətə çatdırılıb ki, azad edilmiş bütün ərazilərin vahid konsepsiya əsasında bərpasına başlanılıb. E.Hüseynov deyib ki, Qarabağ və Şərqi Zəngəzur iqtisadi rayonlarının yeni bölgüsü bərpa və yenidənqurma proqramlarının mərkəzləşdirilmiş şəkildə reallaşdırılmasına xidmət edir.
İşğaldan azad olunmuş ərazilərdə görülən işlərdən danışan Prezidentin xüsusi nümayəndəsi bildirib ki, Qarabağ iqtisadi rayonunda Ağdam və Füzuli şəhərlərinin ümumi və baş planları hazırdır.
Bölmənin digər xəbərləri
