Əmlak Komitəsi xüsusi qayğıya ehtiyacı olan xanımlar üçün “Kütləvi çıxarış” kampaniyası keçirib
Bakı, 7 mart, AZƏRTAC
Martın 7-də Əmlak Məsələləri Dövlət Komitəsi (ƏMDK) tərəfindən daha bir sosial layihə - xüsusi qayğıya ehtiyacı olan xanımlar üçün “Kütləvi çıxarış” kampaniyası keçirilib.
Komitədən AZƏRTAC-a bildirilib ki, xanımlar üçün birbaşa ünvanlarda qeydiyyat xidməti ilə bağlı keçirilən aksiya 8 Mart - Beynəlxalq Qadınlar Günü münasibətilə təşkil olunub.
Azərbaycan qadını bu gün milli dövlət quruculuğu proseslərinin, ictimai-siyasi hadisələrin fəal iştirakçısı olaraq respublikamızın sosial-iqtisadi, elmi-intellektual potensialının artırılmasına əvəzsiz töhfələr verir. Ölkəmizdə qadın hüquqlarının qorunması, gender bərabərliyinin təmin olunması sosial siyasətin tərkib hissəsidir. Hazırda xanımlar dövlətimizin diqqət və qayğısı ilə əhatə olunublar. Ölkə rəhbərliyi qadınların müxtəlif sahələrdə aparıcı qüvvəyə çevrilməsi, idarəçilik sistemində fəaliyyətinin genişləndirilməsi, həyat şəraitinin yaxşılaşdırılması istiqamətində müxtəlif sosial-iqtisadi tədbirlər reallaşdırır. ƏMDK da görülən işlərə uyğun olaraq daha bir sosial layihəyə imza atıb. Komitə öz fəaliyyət sahəsinə aid göstərilən xidmətlərlə bağlı Beynəlxalq Qadınlar Günü münasibətilə xüsusi qayğıya ehtiyacı olan xanımları, o cümlədən şəhid ailələrini, ahılları, Qarabağ müharibəsi əlillərinin həyat yoldaşlarını, fiziki məhdudiyyətli qadınları, tənha anaları fərqli üsulla təbrik edib.
Bu kampaniya çərçivəsində şəhid ailələrinə, Qarabağ müharibəsi əlillərinin həyat yoldaşlarına, o cümlədən fiziki məhdudiyyətli qadınlara birbaşa olaraq yaşadıqları ünvanlarda qeydiyyat xidmətləri göstərilib. Komitənin əməkdaşları xüsusi nəqliyyat vasitələri ilə paytaxtla yanaşı, respublikanın bir neçə rayonlarına, o cümlədən qəsəbələrə, ucqar kənd yerlərinə gedərək, yaşlı qadınlara, tənha analara evlərindəcə əmlaklarına dair hazır çıxarışlar təqdim ediblər. Paytaxt üzrə çıxarış alan xanımlar arasında hətta ahıl, yaşı 80-dən yuxarı olan qadınlar da olub. Eyni zamanda, cəbhə bölgəsində yerləşən rayon sakinləri olan xanımlara birbaşa olaraq ünvanlarında qeydiyyat xidmətləri göstərilib. Verilən çıxarışlar əsasən mənzilləri, fərdi yaşayış evlərini, pay torpaqlarını, həyətyanı torpaqları əhatə edib.
Bu addım xanımlara dövlət qayğısının göstərilməsinin, sosiallıq prinsipinin ön planda olmasının əyani göstəricisidir. Kampaniya həmin təbəqədən olan xanımların daha rahat və optimal yolla əmlaklarını qeydiyyatdan keçirməsinə, onların məmnunluğunun təmin edilməsinə, vaxtlarına qənaət etməsinə şərait yaradıb.
Həmin gün xüsusi qayğıya ehtiyacı olan bir neçə qadın da növbəti mərhələdə çıxarışla əvəz olunması üçün lazımi sənədləri komitə əməkdaşlarına təqdim edib. Komitənin hüquqşünasları kampaniya çərçivəsində xanımların qeydiyyat prosesi və sənədlərlə bağlı suallarını cavablandırıb, sənədlərin necə əldə edilməsi, hansı qurumlara müraciət edilməsi ilə bağlı istiqamət veriblər. Qadınlar sənədləşdirmənin sürətli və rahat şəkildə aparılması, xidmətlərin birbaşa ünvanlarında çatdırılmasından razılıqlarını ifadə ediblər.
Sosialyönümlü mahiyyət daşıyan belə tədbirlər əhalinin qeydiyyat xidmətlərinə marağını artırır, müxtəlif təbəqədən olan vətəndaşların xidmətlərdən faydalanmasını rahatlaşdırır. Xanımlar daşınmaz əmlaklarını rahatlıqla qeydiyyata almaqla yanaşı, həm də onlar mülkiyyət hüquqlarının və əmlaklarının dövlət tərəfindən qorunmasına tam əmin olurlar. Belə tədbirlər qadınların öz əmlaklarının daha fəal şəkildə iqtisadi proseslərə cəlb etməsinə, ölkədə həyata keçirilən ictimai-siyasi fəaliyyətə geniş şəkildə qoşulmalarına imkan verir. Həmçinin daşınmaz əmlak bazarında xanım mülkiyyətçilərin sayının artmasına, leqal əmlakların xüsusi çəkisinin çoxalmasına şərait yaradır.
Əmlak Məsələləri Dövlət Komitəsi tərəfindən vətəndaşların maksimum rahatlığını təmin etməyə yönələn tədbirlər, sosial layihələr davam etdiriləcək, ictimai xidmətlərdə vətəndaş məmnunluğu daha da artırılacaq.
Bölmənin digər xəbərləri
