DÜNYA
Entoni Blinken Sudandakı vəziyyəti münaqişə tərəfləri ilə müzakirə edib
![Entoni Blinken Sudandakı vəziyyəti münaqişə tərəfləri ilə müzakirə edib](/files/2023/1/1200x630/16818044102144419570_1200x630.jpg)
Bakı, 18 aprel, AZƏRTAC
ABŞ-ın Dövlət katibi Entoni Blinken Sudan ordusunun komandanı Əbdül Fəttah əl-Burhan və xüsusi təyinatlı qüvvələrin rəhbəri Məhəmməd Həmdan Daqalo ilə ayrı-ayrılıqda söhbət aparıb.
AZƏRTAC xəbər verir ki, Entoni Blinken görüş zamanı hərbi əməliyyatlar nəticəsində zərər çəkən əhaliyə humanitar yardımın çatdırılması üçün atəşkəsin vacib olduğunu bildirib. O, çox sayda dinc sakinin ölümü və yaralanması ilə bağlı ciddi narahatlığını ifadə edib.
Dövlət katibi söhbət əsnasında hər iki generala vətəndaşların, diplomatik nümayəndəliklərin və humanitar təşkilatların təhlükəsizliyinin təmin olunması ilə bağlı öhdəliklərini xatırladıb.
Qeyd edək ki, Sudan ordusunun komandanı Əbdül Fəttah əl-Burhanla xüsusi təyinatlı qüvvələrin rəhbəri Məhəmməd Həmdan Daqalo arasında fikir ayrılığı ölkədə vəziyyətin gərginləşməsinə səbəb olub. Aprelin 15-də Merove şəhərində və paytaxt Xartumda iki güc strukturu arasında ağır silahların da istifadə olunduğu toqquşmalar başlayıb. BMT-nin Sudan üzrə xüsusi nümayəndəsi Volker Pertesin məlumatına görə, döyüşlər nəticəsində 180-dən çox insan həlak olub, azı 1,8 min nəfər isə yaralanıb.