Ərəb Dövlətləri Liqasının Zirvə toplantısında təmsil olunmaq Azərbaycan üçün əlamətdar hadisədir
Bakı, 3 noyabr, AZƏRTAC
Əfsanəvi qəhrəmanlıq dastanına çevrilmiş İkinci Qarabağ müharibəsində Ermənistan üzərində qazandığımız parlaq Qələbə Azərbaycan tarixinə yeni şanlı səhifə yazdı. Bu qələbə ölkəmizin dünya birliyindəki mövqeyini daha da möhkəmləndirdi, reytinqini yüksəltdi. Zəfərdən sonra ölkəmizlə əməkdaşlıq etmək istəyən dövlətlərin sayı artıb. Prezident, Ali Baş Komandan İlham Əliyevin beynəlxalq tədbirlərdə, o cümlədən xarici ölkələrə səfərlərdə qalib ölkənin Prezidenti kimi qarşılanması hər birimizdə qürur hissi yaradır. Son vaxtlar dövlət başçımızın Brüsseldə, Praqada, Soçidə keçirilən üçtərəfli və dördtərəfli görüşlərdə göstərdiyi yüksək qətiyyət ölkəmizin Cənubi Qafqazda lider dövlət olduğunu bir daha təsdiqlədi. Bu qələbə Azərbaycanın İslam dövlətləri arasında da nüfuzunun yüksəlməsində mühüm rol oynayıb. Prezident İlham Əliyevin bir neçə gün əvvəl Əlcəzair Xalq Demokratik Respublikasının paytaxtı Əlcəzair şəhərində Ərəb Dövlətləri Liqasının 31-ci Zirvə toplantısında iştirakı zamanı da bunun şahidi olduq.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
Ə.Bədəlov deyib ki, Prezident İlham Əliyev Zirvə toplantısına ev sahibliyi edən Əlcəzair Xalq Demokratik Respublikasının Prezidenti Abdelmacid Tebbunun dəvəti ilə fəxri qonaq statusunda iştirak edib. Belə bir nüfuzlu toplantıda təmsil olunmaq ölkəmiz üçün əlamətdar hadisədir. Ümumiyyətlə, Azərbaycan 2006-cı ildən təşkilatın müşahidəçi statusuna üzvdür. Sammitdə Azərbaycanın iştirakı İslam ölkələri arasında birliyin göstəricisidir. Ərəb Dövlətləri Liqası 1945-ci il martın 22-də Misir, İraq, İordaniya, Livan, Səudiyyə Ərəbistanı, Suriya və Yəmən tərəfindən yaradılıb. Hazırda təşkilata 22 dövlət daxildir. Təşkilatın mərkəz-qərargahı Misirin paytaxtı Qahirə şəhərində yerləşir.
Prezident İlham Əliyevin Sammitdəki çıxışının böyük maraqla qarşılandığını bildirən Ə.Bədəlov qeyd edib: “Ölkəmizin bütün beynəlxalq forumlarda müsəlman qardaşlarına dəstəyini əsirgəmədiyini bildirən Prezident dedi ki, biz İslam həmrəyliyinə kifayət qədər töhfə vermişik. 2017-ci ilin Azərbaycanda “İslam Həmrəyliyi İli” elan olunması və ölkəmizin IV İslam Həmrəyliyi Oyunlarına ev sahibliyi etməsi həmrəylik və dostluq bayramına çevrilmişdir”.
Siyasi şərhçi vurğulayıb ki, dövlətimizin başçısının Sammitdəki çıxışı zaman söylədiyi “Azərbaycan da Əlcəzair kimi zamanla işğala məruz qalıb. Ermənistan torpaqlarımızı 30 il işğal altında saxlayıb. Biz bu illər ərzində ərəb qardaşlarımızın dəstəyini hiss etmişik” fikri böyük maraqla qarşılandı. Fransanın Əlcəzair xalqına qarşı törətdiyi qətliamı xatırladan Prezident İlham Əliyev diqqətə çatdırdı ki, bu, dünyanın heç vaxt unutmamalı olduğu bir hadisədir. Çünki Fransa Əlcəzair xalqına qarşı çox dəhşətli bir müharibə aparıb və bu da 1,5 milyon insanın ölümü ilə nəticələnib.
Ə.Bədəlov bu yaxınlarda Fransa Prezidenti Emmanuel Makronun “France 2” telekanalına verdiyi müsahibəsini və azərbaycanlılara qarşı dəhşətli soyqırımı törədən Ermənistana haqq qazandırmasını, həmçinin ölkəmizə qarşı böhtanlarını, ədalətsiz mövqeyini xatırladaraq deyib: “Yaxşı olardı ki, Makron Fransanın Əlcəzair xalqına qarşı törətdiyi dəhşətli soyqırımını da yada salsın. Fransanın Avropada və Afrikada liderlik uğrunda mübarizəsi XX əsrin əvvəllərində xüsusi qəddarlıq aktlarla yadda qalıb. Afrikanın Şimalında yerləşən, qədim sivilizasiyaya malik müsəlman məmləkəti olan Əlcəzairdə törədilən dəhşətli faciə bu gün də unudulmayıb. Ozamankı Fransa hökuməti Əlcəzairdə ekspansiya planlarını həyata keçirmək və orada möhkəmlənmək üçün yerli əhaliyə qarşı qətliamlar həyata keçirmişdir. Bu qəddarlıq bəzi yerlərdə soyqırımı səviyyəsinə çatmışdır. Setif, Guelma və Keratta şəhərlərində baş verən faciələri qətliam adlandırmaq üçün yetərincə faktlar var”.
“Fransanın o vaxt Əlcəzairdə törətdiyi qətliam Ermənistanın azərbaycanlılara qarşı qəddarlığının oxşarıdır”, -deyən Ə.Bədəlov dövlətimizin başçısının Əlcəzairə səfəri çərçivəsində Şəhidlər abidəsini və Milli Mücahidlər Muzeyini ziyarət edərkən səsləndirdiyi fikirləri xatırladıb: “Bu, mənə eyni bizim üzləşdiyimiz, hazırda əziyyət çəkdiyimiz mənzərəni xatırladır. Ermənilər bir milyondan çox minanı işğal dövründə torpağa basdırmışdı. Və müharibə bitdikdən sonra 260-dan çox Azərbaycan vətəndaşı müxtəlif bədən xəsarətləri alıb”. Mücahidlər Muzeyini ziyarət edərkən Prezident İlham Əliyevə belə bir məlumat verildi ki, Fransa Əlcəzairin işğalı zamanı fransızlar torpağa 5 milyondan çox mina basdırıblar. Eynilə ermənilər də işğal etdikləri Azərbaycan ərazilərində on minlərlə mina basdırıblar.
“Azərbaycan Ərəb Dövlətləri Liqasına üzv ölkələrlə ikitərəfli əməkdaşlığa, qarşılıqlı dəstək və həmrəyliyə xüsusi önəm verir. Ümid edirik ki, bu əməkdaşlıq yaxın gələcəkdə daha da inkişaf edəcək”, - deyə Ə.Bədəlov bildirib.
Bölmənin digər xəbərləri
