Ermənistan hakimiyyəti minalanmış sahələrin xəritələrini tez bir zamanda Azərbaycana təqdim etməlidir
Tbilisi, 23 aprel, AZƏRTAC
Xarici havadarlarının dəstəyi ilə Azərbaycan torpaqlarını 30 ilə yaxın bir müddətdə işğal altında saxlayan Ermənistan bu gün acınacaqlı vəziyyətdədir və tam iflasa uğrayıb. Ermənistan hakimiyyəti və separatçı qüvvələr bunu dərk etməli, minalanmış sahələrin xəritəsini tez bir zamanda Azərbaycana təqdim etməlidir. Azərbaycan həmin əraziləri işğaldan azad etdiyi kimi, minalardan da təmizləyəcək və həmin ərazilər yeni inkişaf mərhələsinə qədəm qoyacaq.
AZƏRTAC xəbər verir ki, bu fikirlər aprelin 23-də Marneulidə Azərbaycanın 44 günlük Vətən müharibəsindəki parlaq Qələbəsindən sonra regionda yaranmış vəziyyətə həsr olunmuş dəyirmi masada səslənib.
Gürcüstan Azərbaycanlılarının İnteqrasiya Mərkəzi tərəfindən təşkil olunan tədbirdə siyasətçilər, elm, din və mədəniyyət xadimləri, jurnalistlər iştirak ediblər.
Mərkəzin icraçı direktoru, Azərbaycan Yazıçılar Birliyinin Gürcüstan bölməsinin rəhbəri Rafiq Hümbətov çıxış edərək ölkəmizin 44 günlük Vətən müharibəsindəki qələbəsinin əsas məqamları barədə məlumat verib. Bildirib ki, bu müharibədə Qələbənin əsas amili Azərbaycan Prezidenti ilə xalq arasındakı möhkəm birlik və vəhdət olub. Xalqın etimadına və dəstəyinə arxalanan Ali Baş Komandan Ordunu inamlı Qələbəyə apardı və düşmən üzərində böyük Zəfər qazandı.
Bildirilib ki, Azərbaycan torpaqlarını azad etsə də, münaqişə hələ də bitməyib. Döyüş meydanında məğlubiyyəti həzm edə bilməyən Ermənistan çirkin əməllərindən əl çəkmir. Ermənistanın Azərbaycanın işğal olunmuş ərazilərdə basdırdığı minaların xəritəsinin bu günə qədər ölkəmizə verilməməsi, bu minaların partlaması nəticəsində mülki şəxslərin ölməsi belə deməyə əsas verir.
Sonra Gürcüstan parlamentinin sabiq deputatı, tarixçi alim Mahir Dərziyev Azərbaycanın parlaq Qələbəsinin dünya hərb tarixində nümunə olduğunu bildirib. Onun sözlərinə görə, Azərbaycan Ordusunun yeni müharibə texnikası Ermənistanı və onun havadarlarını qorxuya salıb. Onlar minalanmış sahələrin xəritəsini təqdim etməməklə, əslində, bir daha öz çirkin niyyətlərini və əsl simalarını ortaya qoyublar.
Parlamentin digər sabiq deputatı, ictimai xadim Ruslan Hacıyev, Gürcüstan Azərbaycanlıları Konqresinin sədri Hüseyn Yusubov, Azərbaycanın Əməkdar jurnalisti, “gaxa.ge” portalının baş redaktoru Nizami Məmmədzadə, AZƏRTAC-ın müxbiri Xətayi Əzizov, “Qarapapaqlar” jurnalının baş redaktoru Akif Xansultanlı və başqaları çıxış edərək Ermənistanın biabırçı məğlubiyyətinin səbəblərindən danışıblar.
Bildirilib ki, Azərbaycanın parlaq Qələbəsindən sonra regionda yeni inkişaf mərhələsi başlayıb. Region dövlətləri bu imkandan maksimum istifadə etməli, Azərbaycanın yanında olmalıdırlar.
Dəyirmi masada Xocalı soyqırımı, 31 mart - Azərbaycanlıların soyqırımı və digər faciələrimiz barədə dünya ictimaiyyətinə dəqiq və düzgün məlumatların çatdırılması üçün səylərin daha da artırılması ilə bağlı bir sıra təkliflər irəli sürülüb.
Bölmənin digər xəbərləri
