Fələstinli ekspert: Yaşıl enerji sahəsində əməkdaşlıq ölkələrimizin dayanıqlı inkişaf potensialını artıracaq
Bakı, 2 dekabr, Səbinə Əlizadə, AZƏRTAC
Yaşıl enerjiyə keçid regional əməkdaşlıq üçün yeni imkanlar yaradıb.
Bunu AZƏRTAC - a açıqlamasında ADA Universitetində “Yaşıl Enerji və Dayanıqlılıqda Universitetlərin Rolu” adlı beynəlxalq konfransın iştirakçısı, Fələstinin Nəcəh Milli Universitetinin Enerji Tədqiqatları Bölməsinin direktoru Məhəmməd Səid bildirib.
Onun sözlərinə görə, məhdud enerji resurslarına malik olan Fələstin üçün bərpaolunan enerji sahəsində bilik və təcrübə mübadiləsi xüsusi əhəmiyyət daşıyır: “Bu tədbir bizim üçün çox önəmlidir. Fələstin hazırda yaşıl enerji və dayanıqlılıq üzrə ciddi hədəflər müəyyənləşdirib. Bu hədəfləri reallaşdırmaq üçün beynəlxalq əməkdaşlıq son dərəcə vacibdir. Burada bir çox ölkələrin universitetləri ilə geniş əməkdaşlıq imkanlarının olduğunu müşahidə edirəm. Əvvəllər bu platformalar barədə kifayət qədər məlumatlı deyildik”.
Ekspert qeyd edib ki, regional universitetlərin yaşıl enerji sahəsində əldə etdiyi nəticələr Fələstin üçün praktiki təcrübə kimi dəyərlidir.
“Bu ölkələrin universitetləri bizim yeni nail olmağa çalışdığımız bir çox hədəflərə artıq çatıb. Bilgi mübadiləsi və birgə layihələr vasitəsilə biz də mövqeyimizi gücləndirə bilərik. Bu əməkdaşlıq həm elmi, həm də institusional inkişafı sürətləndirəcək,” – deyə Məhəmməd Səid əlavə edib.
Ekspertin sözlərinə görə, universitetlər arasında tərəfdaşlıq, təcrübə mübadiləsi və elmi araşdırmaların inteqrasiyası regional dayanıqlı inkişaf məqsədlərinə mühüm töhfə verəcək.
Fələstinli ekspert yaşıl enerjinin qlobal əhəmiyyətinə toxunaraq bildirib ki, bərpaolunan enerji mənbələrinin iqtisadi səmərəliliyi və ekoloji üstünlükləri onları yaxın gələcəyin əsas enerji modeli edir: “Yaşıl enerji texnologiyalarının xərcləri getdikcə azalır və bu sahə daha əlçatan olur. Ekoloji baxımdan isə bərpaolunan enerji mənbələrinin faydası ölçülməzdir. Gələcək nəsillər üçün bu texnologiyalar artıq alternativ deyil, əsas standart olacaq. Biz də onları bu yeni enerji reallığına hazırlamalıyıq”.
Məhəmməd Səidin fikrincə, universitetlərarası əməkdaşlıq və bilik transferi region ölkələrinin dayanıqlı inkişaf gündəliyinin həyata keçirilməsində mühüm rol oynayacaq.
Bölmənin digər xəbərləri
