FHN-in karate komandası dünya çempionatında uğurla çıxış edib
Bakı, 21 sentyabr, AZƏRTAC
Çexiya Respublikasının Pardubitse şəhərində Dünya Şotokan Karate Federasiyasının təşkilatçılığı ilə karate üzrə keçirilən 12-ci dünya çempionatında Azərbaycan milli komandasının və Fövqəladə Hallar Nazirliyinin (FHN) idman-sağlamlıq klubunun üzvləri Astan Qasımov, Elnur Əliyev, Ülvi Məmmədov və Xəyal Məmmədov kişilər arasında şəxsi kumite və komanda kumite yarışlarında iştirak edərək yüksək nailiyyətlər qazanıblar.
FHN-in mətbuat xidmətindən AZƏRTAC-a bildiriblər ki, 45 ölkədən 800 idmançının mübarizə apardığı turnirdə 18-21 yaş kateqoriyası üzrə gənclər arasında Astan Qasımov (+84 kq), böyüklər arasında 21 yaşdan yuxarı kateqoriyada isə Ülvi Məmmədov (+84 kq) şəxsi kumite yarışlarında bütün rəqiblərinə qalib gələrək qızıl medal qazanıblar.
Komandanın digər üzvü - 21 yaşdan yuxarı böyüklər arasında şəxsi kumite yarışlarında Elnur Əliyev (+75 kq) yarışın bürünc medalına layiq görülüb. Bundan əlavə, komanda kumite yarışlarında karateçilərimiz Ülvi Məmmədov, Elnur Əliyev yarışın gümüş, Xəyal Məmmədov isə bürünc medalının sahibi olublar.
Karateçilərin ilk məşqçisi, Əməkdar məşqçi və 6-cı dan qara kəmər sahibi Rafael Məmmədov, hazırki şəxsi məşqçisi isə Əməkdar idman ustası, Əməkdar məşqçi, ikiqat dünya çempionu, 8-ci dan qara kəmər sahibi, FHN-in idman-sağlamlıq klubunun rəisi, polkovnik Füzuli Musayevdir.
Füzuli Musayev ənənəvi olaraq keçirilən məşq prosesi zamanı dünya çempionatında uğur qazanmış karateçilərlə görüşərək onları təbrik edib və növbəti yarışlarda uğurlar arzulayıb.
Bölmənin digər xəbərləri
