Fransa İtaliya üzərindən mühacir axınının qarşısını almağa çalışır
Bakı, 23 sentyabr, AZƏRTAC
İtaliyanın Lampeduza adasına minlərlə mühacirin gəlişindən sonra Fransanın hakimiyyət orqanları ölkəyə miqrasiya dalğasının artacağından ehtiyatlanır.
AZƏRTAC xəbər verir ki, BFMTV telekanalının məlumatına görə, insan qaçaqmalçılığı üçün ən həssas məntəqə İtaliya ilə sərhəddə yerləşən Menton şəhəridir. Hər gün Fransa tərəfdə bu istiqamətdə 200-300 qanunsuz mühacir saxlanılır. Son iki həftə ərzində saxlanılan miqrantların sayı 3 min nəfərə, ilin əvvəlindən bəri isə 32 min nəfərə çatıb. Bu, ötən ilin müvafiq dövrü ilə müqayisədə 20 faiz çoxdur.
Hakimiyyət orqanları hələ Lampeduza böhranından öncə Menton şəhərində sərhədin mühafizəsinə əlavə olaraq 200 polis və jandarm cəlb edərək onların sayını 500 nəfərə çatdırıb, hərbçilərin sayı isə iki dəfə artırılıb.
Eyni zamanda, İtaliyadan gələn qatarların sərnişinləri ciddi yoxlamadan keçirilir. Sənədi olmayan sərnişinlər vaqonlardan düşürülür və geri qaytarılır. Hüquq-mühafizə orqanlarının əməkdaşları dronlar və termik müşahidə kameraları da daxil, bütün texniki vasitələrlə təmin olunurlar.
Bölmənin digər xəbərləri
