GƏDƏBƏYDƏ KEÇƏN İLİN YEKUNLARI MÜZAKİRƏ EDİLMİŞDİR

02.03.2006 [14:37]
Çap et
A⁺ A^-

Regionların sosial-iqtisadi inkişafı Dövlət Proqramına uyğun olaraq keçən il Gədəbəy rayonunda görülən işlər ümumrayon müşavirəsində geniş təhlil edilmişdir. Hesabat məruzəsi ilə çıxış edən Gədəbəy Rayon İcra Hakimiyyətinin başçısı Kamran Rzazadə qeyd etmişdir ki, keçən il sahibkarlığın inkişafına göstərilən diqqət və qayğı nəticəsində 11199 yeni iş yeri açılmışdır. Yaradılan sağlam mühit fermer təsərrüfatlarının inkişafını xeyli sürətləndirmiş, nəticədə istehsal olunan kənd təsərrüfatı məhsullarının həcmi nəzərəçarpacaq dərəcədə artmışdır. İqtisadiyyatın əsas sahəsi olan kartof istehsalı əvvəlki ilə nisbətən 14 min 315 sentner çox olmuş, taxıl istehsalı 406 min sentnerə çatdırılmışdır. Uğurlar daha çox ət istehsalı sahəsində nəzərə çarpmışdır. Fermer təsərrüfatları il ərzində 34 min 450 ton məhsul istehsal etmişlər.

Əhalinin sosial problemlərindən daha çox danışan natiq bu sahədə uğurlu addımlar atıldığını və ölkəmizin başçısının qarşıya qoyduğu tapşırıqların həlli istiqamətində rayonda xeyli iş görüldüyünü bildirmişdir. Əhalinin qaz, su və enerji təchizatında irəliləyişlərə nail olunmuş, rayon mərkəzi ilə yanaşı, kəndlərdə də abadlıq işləri aparılmışdır.

Əhaliyə göstərilən səhiyyə xidmətinin və təhsilin səviyyəsini yüksəltmək məqsədi ilə həyata keçirilən tədbirlərdən danışarkən məruzəçi qeyd etmişdir ki, keçən il rayonda 24 yeni məktəb binası tikilmiş, digər ümumtəhsil ocaqları isə əsaslı təmir edilmiş və maddi-texniki bazası möhkəmləndirilmişdir. Rayon sakinlərinə göstərilən tibbi xidmətin səviyyəsini yüksəltmək məqsədi ilə uzun illər tikintisi yarımçıq qalmış mərkəzi rayon xəsətəxanasının bir hissəsi istifadəyə verilmiş, 8 kənddə həkim məntəqəsi yeni binaya köçürülmüş və müasir diaqnostika aparatları ilə təmin edilmişdir.

Hesabat yığıncağında rayon qadınlar şurasının sədri Hüriyyət Məmmədova, gənclər və idman idarəsinin rəisi Sevinc Hüseynova. Malakan icmasının nümayəndəsi Aleksey Ştuxin, fermer təsərrüfatının rəhbəri Daşqın Kazımov, rayon ağsaqqalı Cavanşir Quliyev və başqaları çıxış edərək ötən ildə qazanılan nailiyyətlərdən, qarşıdakı vəzifələrdən danışmışlar. Respublikanın vergilər naziri Fazil Məmmədov müşavirədə çıxış edərək ümummilli liderimiz Heydər Əliyev tərəfindən başlanmış və Prezident İlham Əliyev tərəfindən uğurla davam etdirilən iqtisadi islahatların bəhrələrindən, cari ildə bu nailiyyətləri daha da artırmaq üçün qarşıda duran vəzifələrdən danışmışdır.

Cari ildə görüləcək işlərə dair qərar layihəsi təsdiq olunduqdan sonra respublika Prezidenti İlham Əliyevə rayon ictimaiyyəti adından müraciət qəbul edilmişdir.

Yığıncağın işində Prezidentin İcra Aparatının məsul işçisi Şirəli Əhədov iştirak etmişdir.