Gənc müəllim: Süni intellektdən istifadə olunması tədrisi canlı, maraqlı və müasir edir – MÜSAHİBƏ
Bakı, 5 oktyabr, Aysel Azadqızı, AZƏRTAC
Bu gün Beynəlxalq Müəllimlər Günüdür. Müasir təhsil sistemi gənc, yaradıcı və yeniliklərə açıq müəllimlərin fəaliyyəti ilə daha da zənginləşir. 179 nömrəli tam orta məktəbin ibtidai sinif müəllimi Mədinə Əbilova da müəllimlik peşəsinə böyük sevgi və məsuliyyətlə yanaşır. O, müəllimlik yolunu AZƏRTAC-ın müxbiri ilə bölüşüb.
Mədinə Əbilova 2015-ci ildə Bakı Slavyan Universitetinin İbtidai sinif müəllimliyi fakültəsinə qəbul olub. Universiteti bitirdikdən sonra, 2019-cu ildə müəllimlərin işə qəbulu imtahanında iştirak edərək özünün orta təhsil aldığı Qorxmaz Baxşıyev adına 179 nömrəli məktəbdə pedaqoji fəaliyyətə başlayıb.
Mədinə xanım deyir ki, bu peşə onun üçün sadəcə bir iş deyil, doğma məktəbinə biliklərini bölüşən və gələcək nəsli tərbiyə edən müəllim kimi qayıdışdır.
Mədinə xanımın pedaqogikaya olan sevgisi coğrafiya müəllimi sayəsində yaranıb: “Müəllimimin dərslərinə yanaşması, şagirdlərlə ünsiyyətinə heyran qalırdım və məhz o vaxt onu özüm üçün bir nümunə seçdim. Daha sonra universitetdə oxuduğum illərdə və təcrübədə olarkən uşaqlarla çox vaxt keçirirdim. Getdikcə əmin olurdum ki, məhz bu iş mənə ilham verir. Uşaqlarla ünsiyyət qurmaq, onların kiçik kəşflərinin və uğurlarının bir parçası olmaq mənə böyük sevinc bəxş edirdi. Məhz o zaman həyatımı bu peşəyə həsr etmək qərarını tam olaraq qəbul etdim”.
Mədinə müəllim ilk dərs günündə həyəcanlı olub: “İlk dəfə uşaqların qarşısında artıq şagird kimi deyil, müəllim kimi dayanmışdım. Lakin bilirdim ki, bu gün uşaqlar məndən daha həyəcanlıdırlar. Ona görə də onları isti münasibətlə qarşılamağa çalışdım ki, hər biri özünü güvəndə hiss etsin və onlar üçün yeni mərhələ maraqla başlasın. Əlbəttə, valideyni üçün darıxıb ağlayan balacalar da vardı, amma mən onları sakitləşdirməyi və kiçik qəlblərinə yol tapmağı bacardım. Sonra tanışlıq başladı, birlikdə mahnılar oxuduq, bəziləri şeir və nağıl da danışdı. O gün mənim yaddaşıma böyük yolun başlanğıcı kimi həkk olundu”.
Müsahibimiz şagirdlərinin yeni bir şey öyrənəndə və ya uğur qazandıqda gözlərinin parlamasının onun üçün ən böyük mükafat olduğunu deyir. Mədinə Əbilova hesab edir ki, balaca uşaqlarla işləmək səbir tələb edir.
Müsahibimiz deyir ki, şagirdləri ona daim diqqətli davranmağı və dünyaya onların gözü ilə baxmağı öyrədirlər: “Amma onlardan aldığım ən gözlənilməz dərs səmimiyyətləri və dürüstlükləri ilə ilham vermələridir. Bir dəfə dostluq və emosiyalar barədə danışarkən bir şagirdim dedi: “Müəllim, siz güləndə bizə oxumaq daha asan olur”. Bu söhbətdən sonra anladım ki, mənim enerjim və uşaqlara münasibətim onların əhvalına və uğurlarına düşündüyümdən daha çox təsir edir. Bir daha xatırladım ki, pedaqogika yalnız bilik vermək deyil, həm də dəstək olmaq, ilhamlandırmaq və hər uşağın yanında olmaqdır”.
Mədinə xanım deyir ki, müasir texnologiyalar müəllim üçün yeni imkanlar açır. Onun fikrincə, rəqəmsal vasitələrdən və interaktiv platformalardan istifadə dərsləri daha maraqlı və əyani edir: “Məsələn, təqdimatlar, tədris oyunları və videolar çətin mövzuları sadə və anlaşılan formada izah etməyə kömək edir. Son vaxtlar dərs materiallarını hazırlayarkən şagirdlərə fərdi yanaşmada süni intellekt elementlərindən də istifadə etməyə başlamışam. Texnologiyalar gündəlik işləri asanlaşdırır. Hər bir uşağa daha çox diqqət ayırmağa imkan yaradır, tədrisi canlı, maraqlı və müasir edir”.
Mədinə Əbilova söyləyir ki, şagirdlərinə təkcə bilik vermək yox, həm də onlarda yaxşı keyfiyyətlərin formalaşmasına, məsuliyyət və insansevərlik hisslərinin inkişaf etməsinə çalışıb: “Dərs zamanı və dərsdən kənar çoxsaylı söhbətlərimiz olurdu. İlk buraxılış sinfim yeddinci sinifdə oxuyur. Onların hazırkı müəllimlərindən çalışqan, mehriban və yaxşı uşaqlar olduqlarını eşidəndə qürur duyuram. Bəzi şagirdlərim peşəkar idmanla məşğuldurlar”.
Müsahibimiz deyir ki, dərslərində ünsiyyət, oyun və yaradıcılıq tapşırıqları uşaqların özlərini ifadə etməsinə kömək olur.
Müəllimlər Günü ilə bağlı ən yadda qalan xatirəsi isə şagirdlərinin onun üçün çıxış hazırlamaları olub: “Böyük plakat düzəltmişdilər, bizim birgə şəkillərimizi yapışdırıb və arzularını yazmışdılar. Mahnı oxudular, şeir dedilər, hətta kiçik bir səhnəcik də hazırlamışdılar. Belə anlar mənim üçün maddiyyatdan qat-qat dəyərlidir”.
Gənc müəllimin fikrincə, təhsil zamanla ayaqlaşmalıdır: “Arzu edirəm ki, məktəblərdə müasir texnologiyalar və interaktiv təlim metodları daha fəal tətbiq olunsun. Müxtəlif siniflərin uşaqlarını birləşdirən praktik dərnəklər yaradılmalıdır. Bu dərnəklər uşaqların istedadlarını inkişaf etdirir, əməkdaşlıq etməyi öyrədir və yeni dostluqlar yaradır.
Bundan başqa, oxuya marağı artırmağın vacib olduğunu düşünürəm. Bunun üçün məktəblərdə rəqəmsal kitabxanalardan istifadə olunmalıdır. Beləliklə, hər bir uşaq lazım olan əsərlərə asanlıqla çıxış əldə edər və bu, onların müasir formada ədəbiyyata sevgi bəsləməsinə səbəb olar”.
Bölmənin digər xəbərləri
