“GƏNCƏ SƏNAYE CİHAZ” FƏALİYYƏTİNİ GENİŞLƏNDİRİR
AZƏRTAC-ın müxbiri xəbər verir ki, Azərbaycan Prezidenti İlham Əliyev martın 3-də Gəncənin Heydər Əliyev prospektində yerləşən “Gəncə Sənaye Cihaz” Açıq Səhmdar Cəmiyyətində olmuşdur.
Dövlətimizin başçısı əvvəlcə üzərində “Ümummilli lider Heydər Əliyev tərəfindən əsası qoyulan bu müəssisə bərpadan sonra Prezident İlham Əliyev tərəfindən 3 mart 2008-ci ildə açılmışdır” sözləri yazılan lövhəyə baxdı.
Prezident İlham Əliyev müəssisənin inzibati binasında ulu öndərin 2000-ci il mayın 25-də burada olmasından bəhs edən, zavodun keçmiş və indiki vəziyyətini əks etdirən filmə baxdı.
Dövlətimizin başçısına müəssisənin texniki-iqtisadi göstəriciləri barədə məlumat verildi. Bildirildi ki, Dövlət Əmlakının İdarə Edilməsi üzrə Dövlət Komitəsi ilə “Qalfservis” MMC arasında 2006-cı ildə imzalanmış müqaviləyə əsasən, “Qalfservis” “Gəncə Sənaye Cihaz” Açıq Səhmdar Cəmiyyətinə 3 milyon 500 min avro həcmində investisiya qoyuluşunu öhdəsinə götürmüşdü. 2008-ci ilin fevralına qədər “Qalfservis” müəssisəyə 4 milyon avro sərmayə qoymuşdur. 144 nəfərin işlədiyi zavodda işçilərin orta aylıq əmək haqqı 500 manatdır. Burada qaz və su sayğaclarının istehsalı nəzərdə tutulmuşdur. Hazırda qaz sayğacları istehsalı sexi fəaliyyətdədir. Quraşdırılmış avadanlıq Fransa, İspaniya, Almaniya və Türkiyədən gətirilmişdir. Müəssisənin illik istehsal gücü adi və smart-qaz tipli qaz sayğacları daxil olmaqla, 240 min ədəd təşkil edir. İlkin mərhələdə sayğaclar “Azəriqaz” Qapalı Səhmdar Cəmiyyətinə satılır.
Müəssisənin rəhbərliyi Prezident İlham Əliyevə ölkədə azad sahibkarlığın inkişafına yaratdığı şəraitə görə təşəkkür etdi.
Sonra Prezident İlham Əliyev cihazların yığılması, rənglənməsi proseslərini izlədi, quraşdırılmış müasir texnoloji avadanlığa baxdı. Dövlətimizin başçısı müəssisənin fəaliyyətini yüksək qiymətləndirdi. Özəl sektorun inkişafına bundan sonra da dəstək veriləcəyini bildirdi və gələcəkdə ölkənin tələbatını ödəməklə yanaşı, cihazların xarici bazarlara çıxarılmasının da zəruriliyini vurğuladı. Prezident İlham Əliyevə xatirə olaraq elektron qaz sayğacı hədiyyə edildi.
Sonra dövlətimizin başçısı müəssisənin əhaliyə xidmət mərkəzi ilə tanış oldu. Prezidentə ödənişlərin bankomatlar vasitəsilə həyata keçirildiyi barədə məlumat verildi, bu sistemin çox səmərəli olduğu vurğulandı. Bildirildi ki, hazırda Gəncədə 17,2 min elektron abunəçi vardır və bunlar “Kapital Bank” vasitəsilə ödənişlər aparırlar. Gələcəkdə Gəncədə daha 40 bankomatın quraşdırılması nəzərdə tutulur. Belə olan halda abonentlərin banka getməsinə ehtiyac qalmayacaqdır. Vurğulandı ki, elektron sayğaclar adi sayğaclardan daha əlverişlidir.
Prezident İlham Əliyev görülən işləri yüksək qiymətləndirdi. Yeni sistemin çox səmərəli olduğunu bildirərək dedi ki, insanlar biləcəklər ki, nə qədər pul ödəyiblər. Vətəndaşların qapısını döyməyə ehtiyac olmayacaq, şəffaflıq təmin ediləcəkdir. Bu, çox müasir bir sistemdir. Hamı biləcək ki, nə qədər pul ödəyir və kartda nə qədər pul qalır. Abunəçilər elektron sayğaclarla 100 faiz təmin olunmalıdır.
O da bildirildi ki, hazırda abonentlər arasında elektron sayğaclarda ödəmə depozitlə bərabər 110 faiz təşkil edir. Adi sayğaclar üzrə isə ödəmələr 50 faizdir.
######
 |
 |
 |
Bölmənin digər xəbərləri
