GƏNCƏDƏ “İRƏLİ” İCTİMAİ BİRLİYİNİN “İNFORMASİYA TEXNOLOGİYALARI AKADEMİYASI” LAYİHƏSİNİN TƏQDİMAT MƏRASİMİ KEÇİRİLMİŞDİR
Gəncə, 1 iyun (AZƏRTAC). “İrəli” İctimai Birliyinin Azərbaycanın müxtəlif regionlarında gənclərin, xüsusən gənc müəllimlərin informasiya və kommunikasiya texnologiyaları sahəsində maarifləndirilməsi, ilkin biliklərin formalaşdırılması məqsədi ilə Gəncədə “İnformasiya Texnologiyaları Akademiyası” adlı maarifləndirici layihənin təqdimat mərasimi keçirilmişdir.
Layihənin tərəfdaşları - Gənclər və İdman, Rabitə və İnformasiya Texnologiyaları nazirliklərinin, HP, Microsoft, Bestcomp və Yumroo şirkətləri nümayəndələrinin iştirakı ilə keçirilən tədbiri giriş sözü ilə açan Gəncə şəhər İcra hakimiyyəti başçısının müavini Akif Ələkbərov belə bir layihənin Gəncədə reallaşmasını şəhər gənclərinin həyatında əlamətdar hadisə kimi dəyərləndirmiş və “İrəli” İctimai Birliyinə minnətdarlıq etmişdir.
Sonra birliyin rəhbəri Ceyhun Osmanlı çıxış edərək müasir informasiya cəmiyyətinin ən vacib tələblərindən olan informasiya texnologiyaları sektorunun həyatımızın bütün sahələrində oynadığı roldan, eləcə də Azərbaycan cəmiyyətinin gələcəyi, onun aparıcı qüvvəsi olan gənclərin, informasiya və kommunikasiya texnologiyalarından səmərəli istifadə edə bilməsi üçün onların maarifləndirilməsində bu layihənin əhəmiyyətindən danışmışdır. Qeyd olunmuşdur ki, Azərbaycanın bütün regionlarını əhatə edəcək “İnformasiya Texnologiyaları Akademiyası” layihəsi bir il fəaliyyətdə olacaqdır. 50 min gənci öz ətrafında birləşdirəcək layihə regionlarda yaşayan gəncləri qlobal informasiya cəmiyyətinə qovuşduracaqdır.
Mərasimdə Gəncə Dövlət Universitetinin rektoru, professor Elman Məmmədov, YAP Gəncə şəhər təşkilatının sədri, professor İsrafil İsmayılov və başqaları çıxış edərək layihəni yüksək qiymətləndirdilər.
Bölmənin digər xəbərləri
