GƏNCLƏR ARASINDA “NƏ? HARADA? NƏ ZAMAN?” İNTELLEKTUAL OYUNLARI KEÇİRİLMİŞDİR
Bakı, 23 may ( AZƏRTAC). Mayın 23-də Gəncliyə Yardım Fondunda gənclər arasında “Nə? Harada? Nə zaman?” intellektual oyunları üzrə “Bahar kuboku” uğrunda yarış keçirilmişdir.
Bakı Şəhər Gənclər və İdman Baş İdarəsinin, Xəzər İntellektual Klubu və Gəncliyə Yardım Fondunun təşkil etdikləri yarışda hər birində 6 nəfər olmaqla, 18 komanda mübarizə aparmışdır.
Gəncliyə Yardım Fondunun prezidenti Əhməd Tecim bildirmişdir ki, yüksək intellektual səviyyəli gənclərə malik olan bir ölkənin gələcəyi parlaqdır. Ümummilli lider Heydər Əliyevin ölkə gənclərinə daim diqqət və qayğı ilə yanaşdığını vurğulayan natiq, bu siyasətin Prezident İlham Əliyev tərəfindən uğurla davam etdirildiyini diqqətə çatdırmış və yarış iştirakçılarına uğurlar diləmişdir.
Gənclər və İdman Nazirliyinin nümayəndəsi Elşən Hüseynov gənclərin elmə maraq göstərməsini, öz biliklərini nümayiş etdirməsini müsbət dəyərləndirmiş, gənc nəslin elmə və biliyə yiyələnməsinin ümumbəşəri dəyərlərdən biri olduğunu söyləmişdir. E.Hüseynov bilik yarışmasına respublikanın digər bölgələrindən də gənclərin qoşulduqlarını və böyük marağa səbəb olmuş belə tədbirlərin gələcəkdə də davam etdiriləcəyini vurğulamışdır.
Qeyd edək ki, üç turdan ibarət olan oyunların hər turunda komandalara 15 sual verilmişdir. İntellektual oyunda 1-ci yeri “Pentakt” komandası tutmuşdur. “Mafiya” 2-ci, “Triumf ” isə 3-cü pillədə qərarlaşmışlar.
Qalib gəlmiş komandalar Bakı Şəhər Gənclər və İdman Baş İdarəsinin diplom və qiymətli hədiyyələri ilə mükafatlandırılmışlar.
Bölmənin digər xəbərləri
