GƏNCLƏR VƏ İDMAN NAZİRLİYİ JURNALİSTLƏR ARASINDA VI ÜMUMRESPUBLİKA MÜSABİQƏSİ KEÇİRİR
Gənclər və İdman Nazirliyinin mətbuat xidmətindən AZƏRTAC-a bildirmişlər ki, qurum 29 yaşadək jurnalistlər arasında VI Ümumrespublika müsabiqəsi keçirir.
İyunun 15-dən 30-dək davam edəcək müsabiqədə kütləvi informasiya vasitələrində çalışan (elektron KİV istisna olmaqla) jurnalistlər iştirak edə bilərlər.
Bildirilmişdir ki, qaliblər əsasən “Gənclərin mənəvi-əxlaqi və vətənpərvərlik tərbiyəsi”, “Gənc ailə”, “Respublikanın sosial iqtisadi inkişafında gənclərin rolu”, “Gənclik: elm və təhsil”, “Gənclik: mədəniyyət və incəsənət”, “Gənclik və idman” və “Gənclərin ictimai siyasi fəaliyyəti” nominasiyaları üzrə seçiləcəklər. Hər nominasiya üzrə müəyyən olunacaq yalnız bir qalibə 500 manat pul mükafatı və diplom təqdim ediləcəkdir. Digər iştirakçılara isə şəhadətnamələr veriləcəkdir.
Müsabiqənin şərtlərinə görə iştirakçılar yalnız yanvarın 1-dən iyunun 25-dək dərc olunmuş materialları müsabiqəyə təqdim edə bilərlər.
Mükafatlandırma mərasimi iyulun 22-də Milli Mətbuat günündə keçiriləcəkdir.
Bölmənin digər xəbərləri
