Gürcüstan hökuməti “Dəmir yolu sərnişinlərinin hüquqlarının müdafiəsi qaydaları”nı təsdiqləyib
Tbilisi, 14 avqust, AZƏRTAC
Gürcüstanın iqtisadiyyat və davamlı inkişaf nazirinin əmri ilə "Dəmir yolu sərnişinlərinin hüquqlarının müdafiəsi Qaydaları” təsdiq edilib.
AZƏRTAC xəbər verir ki, bu barədə Gürcüstanın İqtisadiyyat və Davamlı İnkişaf Nazirliyi məlumat yayıb.
Bildirilir ki, bu qaydalar dəmir yolu nəqliyyatı sektorunda sərnişin hüquqlarının qorunması üçün vahid, effektiv və şəffaf sistemin yaradılmasına, eləcə də xidmət keyfiyyətinin və etibarlılığının artırılmasına töhfə verəcək. Yeni qaydalar Gürcüstanda qeydiyyatdan keçmiş dəmir yolu müəssisəsi tərəfindən həyata keçirilən daxili və beynəlxalq dəmir yolu sərnişin daşımalarına şamil edilir.
Yeni qaydalara əsasən dəmir yolu rəhbərliyi sərnişini məlumatlandırmaq öhdəliyi götürür. Eyni zamanda, bilet və marşrutun dəyişdirilməsi üzrə gediş haqqının geri qaytarılması, gecikmələr üçün kompensasiya ödəmək, 60 dəqiqədən çox gecikmə halında dəmir yolu müəssisəsi sərnişinə pulsuz yemək və içkilər, zərurət yarandıqda isə müvəqqəti yaşayış yeri və nəqliyyat təklif olunması, baqajın daşınması ilə bağlı məsələlər, o cümlədən baqajın itirilməsi, zədələnməsi və gec çatdırılması halında kompensasiya şərtləri, dəmir yolu qəzası, ciddi dəmir yolu qəzası və ya hadisəsi halında sərnişinin həyatı və sağlamlığına dəyən zərərin əvəzinin ödənilməsi, əlilliyi olan şəxslər və hərəkət qabiliyyəti məhdud olan şəxslər üçün xidmət şərtləri, dəmir yolu müəssisəsi xidmət keyfiyyəti standartlarını müəyyən etməyə və keyfiyyət idarəetmə sistemini tətbiq etməyə borcludur.
Dəmir yolu sərnişinlərinin hüquqlarının qorunmasına Dəmir Yolu Nəqliyyatı Agentliyi nəzarət edəcək.
Bölmənin digər xəbərləri
