Gürcüstanda Azərbaycandilli Məktəblərin Müəllimlərinin Birinci Qurultayı keçirilib
Tbilisi, 25 iyun, AZƏRTAC
Gürcüstanda Azərbaycandilli Məktəblərin Müəllimlərinin Birinci Qurultayı keçirilib.
AZƏRTAC xəbər verir ki, tədbirdə Azərbaycan Respublikası Diasporla İş üzrə Dövlət Komitəsinin, ölkəmizin Tbilisidəki səfirliyinin, Gürcüstanın Təhsil və Elm Nazirliyini, Milli Qiymətləndirmə və İmtahan Mərkəzinin, Müəllimlər Evinin məsul əməkdaşları, ölkənin müxtəlif bölgələrindən azərbaycandilli məktəblərdən 250-dən çox müəllim, QHT və ictimaiyyət nümayəndələri iştirak ediblər.
Tədbirin təşkilat komitəsinin sədri, “Maarif” təşkilatının rəhbəri və eyniadlı qəzetin baş redaktoru Ələddin Qarabağlı çıxış edərək bildirib ki, qurultayın məqsədi Gürcüstandakı azərbaycandilli məktəblərdə vəziyyəti müzakirə və təhlil etmək, məktəblər arasında əlaqələri genişləndirmək, şagird və müəllim mübadiləsi, dövlət dili ilə yanaşı, ana dilinin tədrisi, dərs saatlarının bölgüsünü düzgün müəyyənləşdirməkdir.
Təhsil və Elm Nazirliyinin nümayəndəsi Despine Koyava qurultay iştirakçılarını təbrik edib, qurultayın keçirilməsini yüksək qiymətləndirib. Bildirib ki, bu cür tədbirlər ölkədə təhsilin inkişafına, mövcud problemlərin həllinə təkan verəcək.
Ölkəmizin Gürcüstandakı səfirliyinin məsul əməkdaşı Anar Rəsulov Azərbaycan dövlətinin soydaşlarımıza göstərdiyi diqqət və qayğıdan danışıb. Bildirib ki, Azərbaycan dövləti hər il Gürcüstandakı azərbaycandilli məktəblərə minlərlə dərslik və digər əyani vəsait göndərir, azərbaycanlı tələbələrin təhsil haqlarını ödəyir. Azərbaycan dövlətinin və Heydər Əliyev Fondunun dəstəyi ilə Gürcüstanda çoxlu sayda məktəb, uşaq bağçası, idman kompleksi tikilib və əsaslı təmir olunub.
Sonra iqtisadiyyat üzrə fəlsəfə doktoru, təşkilat komitəsinin üzvü Aygün İsayeva çıxışında deyib ki, Gürcüstanda ilk azərbaycandilli məktəb 1848-ci ildə Tbilisidə açılıb. İkinci məktəb 1875-ci ildə Marneuli rayonunun Qızılhacılı kəndində açılıb. Sonradan bu məktəblər bölgələrdə də açılıb və 1977-ci ildə onların sayı 174 olub. Lakin müəyyən səbəblərdən bu gün məktəblərimizin sayı 116-ya enib.
Bildirilib ki, Gürcüstanda Azərbaycandilli Məktəblərin Müəllimlərinin Birinci Qurultayı 1925-ci ildə, ikinci qurultay 1959-cu ildə, sonuncu qurultay isə 1977-ci ildə keçirilib. Bugünkü qurultay Gürcüstanın müstəqillik tarixində ilk qurultaydır. Qurultayın yenidən keçirilməsi azərbaycanlıların birliyinin bariz nümunəsidir.
Gürcüstanın Strateji Planlaşdırma Mərkəzinin rəhbəri Levan Mamaladze, Milli Qiymətləndirmə və İmtahan Mərkəzinin nümayəndəsi Eteri Alxazava və başqaları çıxış edib, məktəblərdə və ümumiyyətlə, Gürcüstanın təhsil sistemindəki yeniliklər, eləcə də problemlərdən danışıblar.
Sonra qurultay panel iclaslarda işini davam etdirib.
“SALAM” platformasının təsisçisi Kamran Məmmədli, “Yeni Düşüncə İnstitutunun” rəhbəri Ariz Daşdəmirov və Aygül İsayevanın iştirakı ilə keçirilən paneldə dövlət dili ilə bağlı problemlər və onların həlli yolları, dövlətin həyata keçirdiyi islahatlar, müəllimlərin status almaları ilə bağlı məsələlər təhlil olunub, çıxış yolları müzakirə edilib.
Digər paneldə isə ana dili ilə bağlı yaşanan problemlər, Gürcüstandakı Azərbaycandilli məktəblərdə ana dili üzrə dərs saatlarının azaldılması və s. məsələlər müzakirə olunub.
Növbəti qurultayın 2025-ci ildə keçirilməsi qərara alınıb.
Qeyd edək ki, qurultay “Maarif” təşkilatı, “SALAM” platforması və “Qafqaz və Hüquq İnteqrasiya Mərkəzi”nin birgə təşkilatçılığı ilə keçirilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
