Həm Avropa, həm Azərbaycan bir-biri ilə daha güclü əlaqələrin tərəfdarıdır
Bu fikir Azərbaycanın Belçikadakı səfiri Fuad İsgəndərovun “EurActiv” portalına müsahibəsində yer alıb
Brüssel, 4 oktyabr, AZƏRTAC
Avropa məsələlərini işıqlandıran nüfuzlu “EurActiv” xəbər portalı Azərbaycanın Belçikadakı səfiri Fuad İsgəndərovun müsahibəsini dərc edib.
Səfir deyib ki, Azərbaycan hazırda dörd elementdən ibarət yeni Cənub Qaz Dəhlizinin tikintisi istiqamətində çox ciddi iş görür. “Şahdəniz-2” hasilat həlqəsi artıq 90 faizədək yekunlaşdırılıb, Azərbaycandan Gürcüstana uzanan hissə də təxminən eyni həcmdə başa çatıb. Türkiyə ərazisi boyu keçən TANAP-ın 86-87 faizi icra edilib, Yunanıstan, Albaniya və İtaliyadan keçən Trans-Adriatik boru xətti üzrə işlər də yaxşı gedir. Hazırda Azərbaycan ilə Avropa ölkələri arasında siyasi dialoqun inkişaf etdirilməsi üçün çox yaxşı iqtisadi və ticarət bazası mövcuddur. Burada söhbət yalnız enerji təhlükəsizliyindən və Azərbaycanın Avropanı enerji ilə təchiz etməsindən getmir. Belə ki, biz Cənub Qaz Dəhlizinin tikilməsini müstəsna siyasi dialoq üçün çox güclü özül kimi dəyərləndiririk.
Səfir deyib: “Şərq Tərəfdaşlığı üçün ən problemli məsələ nədən ibarətdir? Əksər hallarda bu, Avropa İttifaqının 6 müxtəlif ölkə üzrə ikitərəfli əlaqə çərçivələrinin bir araya gətirilməsi ilə bağlıdır. Konkret olaraq “Cənub Qaz Dəhlizi” layihəsinə Avropa İttifaqının enerji məsələləri üzrə strateji tərəfdaşı Azərbaycan, assosiativ tərəfdaş Gürcüstan, üzv ölkə Yunanıstan, namizəd ölkə Albaniya və digər üzv ölkə İtaliya cəlb edilib. Belə geniş əhatəyə malik bir layihə ilə biz məhz “Şərq Tərəfdaşlığı” layihəsinin ehtiyac duyduğu məqamı - uğurlu layihə idarəçiliyini ortaya qoyuruq. Bu, Azərbaycanın ikitərəfli əlaqələri üçün müstəsna əhəmiyyət kəsb edir. Belə ki, bu güclü ticari-iqtisadi özül üzərində biz təkcə ikitərəfli deyil, həm də çoxtərəfli əsasda siyasi dialoq qurmağa çalışırıq. Çünki bu halda biz hamımız bir yerdəyik”.
Səfir son vaxtlar Azərbaycana qarşı qarayaxma kampaniyasının aparılması ilə bağlı suala cavabında bütün bunların sifariş xarakteri daşıdığını vurğulayıb. “Biz Avropaya nə qədər çox yaxınlaşırıqsa, o qədər də çox tənqid eşidirik. Təəssüf ki, bu, əksər hallarda süni və əsassız xarakter daşıyır. Biz bu cəhdlərin arxasında kimin durduğundan xəbərdarıq. Həm Avropa, həm Azərbaycan bir-biri ilə daha güclü əlaqələrin tərəfdarıdır. Azərbaycanın Avropa bazarına yaxınlaşması həm Azərbaycanın, həm də enerji təchizatı və təhlükəsizliyi baxımından Avropanın xeyrinədir. Avropaya yaxınlaşmaq siyasi baxımdan da bizim üçün önəmlidir. Bu, Avropa dəyərlər məkanına yaxınlaşmaq deməkdir. Lakin belə inkişafa, Azərbaycanın Avropa İttıfaqı ilə yaxınlaşmasına mane olmaq istəyən qüvvələr həmişə var. Biz anlayırıq ki, avropalı tərəfdaşlarımıza nə qədər yaxın oluruqsa, bu sıx tərəfdaşlığa qarşı belə addımlar daha çox olacaq. Çünki Azərbaycanın dünyada özünə düşüncə baxımından daha yaxın məkan, eləcə də dəyərlər məkanı və əlbəttə ki, bazar kimi Avropaya ehtiyacı var. Lakin Avropanın da öz qonşuluğunda Azərbaycana ehtiyacı var. Çətinliklərlə üzləşməyimizə baxmayaraq, intensiv əməkdaşlıq edirik”, - deyə diplomat qeyd edib.
Fuad İsgəndərov Avropa İttifaqı ilə imzalanacaq yeni sazişin şirkətlər arasında birbaşa maliyyə əməliyyatlarının aparılması üçün imkanlar yaradacağını diqqətə çatdırıb.
Səfir Azərbaycandakı tolerant mühit barədə də danışıb. Qeyd edib ki, Azərbaycanda hər kəs - bütün dinlərin və millətlərin nümayəndələri sülh və əmin-amanlıq şəraitində yaşayırlar. Avropa İttifaqının bu qədər mürəkkəb qonşuluğa malik olduğu şəraitdə 10 milyon əhalisi olan Azərbaycan proqnozlaşdırıla bilən, etibarlı, dünyəvi, bütün dinlərə hörmət bəsləyən tolerant ölkədir.
Pərvanə Qarayeva
AZƏRTAC-ın xüsusi müxbiri
Brüssel
Bölmənin digər xəbərləri
