HƏMYERLİMİZ SAMARADA BACARIQLI FERMER KİMİ TANINIR
Rövşən Hüseynov Zərdab rayonunun Pərvanlı kəndində orta məktəbi bitirib Tolyatti Ali Hərbi Komandirlər Məktəbinə daxil olanda ağlına da gətirməzdi ki, gələcəkdə onu zabit karyerası yox, fermer şöhrəti gözləyir.
AZƏRTAC xəbər verir ki, Rövşən hazırda Samara vilayətinin Bolşeqluşitsk rayonundakı Yujnı sovxozunda uğurla inkişaf edən “Elmir” məhdud məsuliyyətli müəssisəsinin təsisçisi və rəhbəridir. O, buraya hələ hərbi məktəbin sonuncu kursunda oxuyarkən ailə qurduğu Vasil Burqanovanın valideynlərinin yanına ötən əsrin 90-cı illərinin əvvəllərində Latviyanın Liepaya şəhərindən köçüb gəlmişdir. Həmin dövrdə Pribaltikada baş verən hadisələr onu ilk övladının-oğlu Elmirin doğulduğu rahat ev-eşiyini qoyub hərbi xidmətdən uzaqlaşmağa məcbur etmişdi.
Elmir Hüseynov deyir ki, pambıqçı ailəsində böyümüşəm. Atam briqadir olub. Tərxis edildikdən sonra əvvəlcə kommersiya ilə məşğul olmaq istədim. Alma satdım, sənaye mallarının ticarətinə qoşuldum. Nəhayət, əcdadlarımın “çörək ağacına”-torpağa üz tutdum. İlkin vəsait toplayıb iki köhnə traktor aldım. Birinci il icarəyə götürdüyüm 350 hektarda taxıl əkdim. İki ildən sonra artıq 3 min hektar torpağı becərməyə başladım. Hazırda 5.230 hektarda çalışırıq. Üç il əvvəl 39, ötən il isə daha 20 baş inək almışam. Bu gün naxırımızda 411 baş iribuynuzlu mal-qara vardır. Cavan heyvanları hər gün 550 qram kökəltməyə nail olmuşuq. Gündəlik yemə 8 kiloqram konsentrat qatırıq. 200-ə yaxın qoyun saxlayırıq. Düzü, qoyunçuluq daha sərfəlidir. Təsərrüfatımızda altı daimi işçi çalışır. Yaz-tarla işləri zamanı mövsümi işçilər də cəlb edirik. İstehsal etdiyimiz mal ətini vilayət bazarında satır, qoyun ətini isə müqavilə əsasında Samara şəhərindəki restorana veririk. Gəlirimizdən səmərəli istifadə edirik. Qoyun ferması, örtülü xırman tikmişik, iki təzə MT3-82-M traktoru, iki toxumsəpən, günəbaxan səpmək və becərmək üçün iki texnika almışıq. Daha 100 inək almaq barədə danışıq aparırıq.
Həmyerlimiz haqqında Bolşeqluşitsk rayonunda çıxan “Stepnıye izvestiya” qəzetində vaxtaşırı materiallar dərc olunur.
Bölmənin digər xəbərləri
