Həndbol üzrə Azərbaycan çempionatında növbəti turun oyunları keçirilib
Bakı, 18 aprel, AZƏRTAC
Həndbol üzrə Azərbaycan çempionatında növbəti turun oyunları keçirilib.
AZƏRTAC Azərbaycan Həndbol Federasiyasının mətbuat xidmətinə istinadla xəbər verir ki, qadınlardan ibarət komandaların yarış cədvəlinin lideri “Azəryol” “Qarabağ” ilə görüşdə də pərəstişkarlarını sevindirib. Gözlənildiyi kimi gərgin idman mübarizəsi ilə yadda qalan oyunun ilk hissəsində üstünlüyə yiyələnən “Azəryol” sonadək təşəbbüsü qoruyaraq inamlı qələbə qazanıb - 37:28. “İdman Akademiyası”-“Azərsu” oyunu da maraqlı idman mübarizəsi şəraitində keçib. “Azərsu” fasiləyə 2 xal fərqi ilə üstün yollansa da, artığını bacarmayıb. Geriliyi aradan qaldıran “İdman Akademiyası” görüşü heç-heçə başa vurub - 24:24.
Beş oyundan maksimum nəticə göstərən “Azəryol” çempionatın vahid lideridir. “Qarabağ” ondan 4 xal geri qalır. “İdman Akademiyası” ilə “Azərsu”nun hərəyə 2 xalı var.
Kişi həndbolçuların çempionatının 7-ci turunda lider “Bakı” yarışda ilk məğlubiyyəti ilə barışıb. Paytaxtın eyniadlı komandası “Təhsil” ilə gərgin mübarizə şəraitində keçən oyunda 26:29 hesabı ilə uduzub.
“Gənclər Birliyi” - U-18 İdman Akademiyası görüşündə nominal qonaqlar 36:24 hesabı ilə qalib gəliblər.
U-16-“Məhsul” qarşılaşmasında isə ev sahibi qismində çıxış edən komanda qələbə qazanıb - 33:26.
8-ci turun oyunlarında isə “Bakı” U-16-ya 31:20, “Məhsul” U-18 İdman Akademiyasına 27:26, “Təhsil” “Gənclər Birliyi”nə 38:28 hesabı ilə qalib gəlib.
8 oyundan 14 xal toplayan “Bakı” yarış cədvəlinə liderlik edir.
“Təhsil” 11 xalla ikincidir. U-16” və U-18 İdman Akademiyasının hərəyə 9, “Məhsul”un 3, “Gənclər Birliyi”nin 2 xalı var.
Bölmənin digər xəbərləri
