ORDU
Hərbi əsir A.İnciqulyanla bağlı təbliğat kampaniyası Ermənistanın xüsusi xidmət orqanları tərəfindən ssenariləşdirilib
Bu barədə AZƏRTAC-a Müdafiə Nazirliyinin mətbuat xidmətindən məlumat verilib. Müdafiə Nazirliyi bildirir ki, A.İnciqulyan şüurlu surətdə döyüş postunu könüllü tərk edərək silahı ilə birlikdə Azərbaycan hərbiçilərinə təslim olub. Erməni hərbi əsir ona qarşı heç bir təzyiq və təsir göstərilmədiyini, Ermənistana geri qayıtmayacağını və üçüncü ölkədə yaşamaq istədiyini dəfələrlə bəyan edib.
A.İnciqulyan Cenevrə Konvensiyasının tələblərinə uyğun qaydada və müvafiq yerdə saxlanılıb, ona qarşı nə beynəlxalq, nə də insani qanunlara zidd olan hərəkətlər tətbiq edilməyib. Erməni hərbi əsir müvafiq beynəlxalq təşkilatların qayğısı ilə əhatə edilib, onunla bağlı həyata keçirilən bütün tədbirlər həmin təşkilatların nəzarəti altında icra olunub.
Məlumatda, həmçinin bildirilir ki, A.İnciqulyan və onunla bir yerdə saxlanılan digər beş nəfər Ermənistan vətəndaşından ibarət ailənin bu ölkəyə geri qaytarılması barədə rəsmi Bakının dəfələrlə və təkidlə beynəlxalq təşkilatlar, o cümlədən erməni tərəfi qarşısında məsələ qaldırmasına baxmayaraq, rəsmi Yerevanın hərbi-siyasi rejimi öz vətəndaşlarına qarşı hər dəfə etinasızlıq nümayiş etdirərək onların taleyinə biganə münasibət göstərib. Bu səbəbdən də hazırda Azərbaycanda saxlanılan ermənilər Ermənistana qayıtmaqdan imtina edərək üçüncü ölkədə sığınacaq tapmaq niyyətindədirlər.
Digər tərəfdən, erməni mətbuatının yaydığı şəkillərdə gümrah və sağlam görünən A.İnciqulyanla guya “ona qarşı Azərbaycanda təzyiqlərin və işgəncələrin verilməsi” iddiası arasında uyğunsuzluq açıq-aydın görünür və bu, ermənilərin növbəti uydurması kimi qiymətləndirilməlidir.
Beynəlxalq təşkilatın himayəsi altında olan bu kimi şəxslər barədə konfidensial hesab edilən məlumatların Ermənistan tərəfinə ötürülməsi də şübhə doğuran məqamlardandır. Şübhə yoxdur ki, A.İnciqulyanın yerini müəyyənləşdirən, bu məqsədlə kriminal qruplaşmalarla sıx əlaqədə olan erməni diasporunun xidmətlərindən istifadə edən Ermənistan tərəfi onun ailə üzvlərinə və yaxınlarına təzyiq göstərməklə Yerevana guya könüllü olaraq qayıtdığını deməyə məcbur ediblər.
Müdafiə Nazirliyi bir daha bildirir ki, A.İnciqulyanın Yerevan aeroportunda əvvəlcədən hazırlanmış formada təmtəraqlı qarşılanması, Azərbaycana qarşı nifrət, Ermənistana məhəbbət dolu müsahibəsi, bu prosedurların erməni kütləvi informasiya vasitələri tərəfindən işıqlandırılması, onun yenidən orduya qayıdaraq xidmətinin qalan hissəsini də çəkməsi kimi gülünc təşəbbüslə çıxış etməsi eyni mərkəzdən, özü də Ermənistanın xüsusi xidmət orqanları tərəfindən ssenariləşdirilən və həyata keçirilən növbəti şoudur.