Hesabat: Çexiyada gənclərin radikallaşması tendensiyası müşahidə olunur
Praqa, 11 iyul, AZƏRTAC
Çex gəncləri radikallaşır və onlar sosial mediada getdikcə daha çox zorakı məzmun seçirlər.
AZƏRTAC xəbər verir ki, bu barədə Çexiya Təhlükəsizlik və İnformasiya Xidmətinin (BIS) 2024-cü il üzrə hesabatında deyilir.
Keçən il əks-kəşfiyyat 13-21 yaş arası iyirmi istifadəçidən ibarət qrup müəyyən edib ki, onlar ifrat sağçı məzmunu axtarıb yayırlar.
BIS-in hesabatında deyilir: “Bəzi istisnalarla gənc radikallar müxtəlif bölgələrdə yaşasalar da və bir qayda olaraq bir-birlərini şəxsən tanımasalar da, “Telegram” və “TikTok” kimi sosial şəbəkələr vasitəsilə bir-biri ilə əlaqə saxlayıblar. Onlar, əsasən, imkansız ailələrdən olan yeniyetmələr və cəmiyyətdən təcrid olunmuş gənclərdir”.
Çexiyada radikallasan gənclərin böyük əksəriyyəti konkret təşkilatlarla əlaqəli olmasalar da, Yaxın Şərqdən bəzi şəxslər ələ alınan 21 yaşlı bir çex ilə “Telegram” vasitəsilə əlaqə saxlayıblar. Bu yaxınlarda polis və əks-kəşfiyyat azlıqlara qarşı nifrət və ekstremizmi təbliğ edən beş nəfərdən ibarət qrupu həbs edib. Onlardan ikisi ötən ilin yanvarında Brnoda sinaqoqu yandırmağa cəhddə ittiham olunub. Şübhəlilərin əksəriyyətinin yaşı 18-dən azdır, lakin qrupa 15 yaşdan kiçik yeniyetmələr də daxildir.
BIS-in məlumatına görə, sosial əlaqələrin çatışmazlığı və ətrafdakı insanlardan az maraq görməkdən əziyyət çəkən insanlar ultra-radikal baxışlara xüsusilə həssasdırlar. Sosial media alqoritmləri burada əsas rol oynayır, istifadəçilərə tələb etdikləri məzmunu təklif edir.
Əks-kəşfiyyatın hesabatında deyilir: “Radikallaşma tendensiyasının mühüm səbəbi sosial media alqoritmləri olub. Bu alqoritmlər hətta radikal mövzularda olan məzmunu ona meylli istifadəçilərə getdikcə daha effektiv şəkildə yönəldir. Hesabat müəllifləri qeyd edirlər ki, gənclər təkcə Çexiyada deyil, Avropanın bir çox ölkəsində də radikal ideologiyaya meyl göstərirlər.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
