Hesabat ilində DİM-in göstərdiyi elektron xidmətlərdən istifadə sayı 12 milyonu ötüb
Bakı, 4 iyul, AZƏRTAC
Dövlət İmtahan Mərkəzi (DİM) 2022-ci ildə də informasiya-kommunikasiya texnologiyalarının (İKT) kütləvi proseslərə tətbiqi istiqamətində işləri intensiv şəkildə davam etdirib, bu sahədə bir sıra yeni layihələr həyata keçirib. Mərkəzin ictimaiyyətə göstərdiyi 18 elektron xidmət növündən hesabat ilində 12 milyon 171 min dəfədən çox istifadə olunub. Bunlar dövlət qurumlarının icraatında olan elektron xidmət layihələri arasında ən çox istifadə olunan layihələrdəndir.
AZƏRTAC xəbər verir ki, bu barədə məlumat “Abituriyent” jurnalının 12-ci nömrəsində yer alıb. Həmçinin qeyd edilib ki, İKT ali təhsil müəssisələrinin bakalavriat və magistratura səviyyələrinə, rezidenturaya, orta ixtisas təhsili pilləsinə qəbul prosesində, ümumi təhsil müəssisələri şagirdlərinin buraxılış imtahanlarında, dövlət qulluğuna işə qəbulun bütün mərhələlərində tətbiq edilib və yüz minlərlə vətəndaşa elektron xidmət göstərilib.
Bölmənin digər xəbərləri
