HƏVƏSKAR KOMANDALAR ARASINDA ÇİMƏRLİK FUTBOLU ÜZRƏ İLK AZƏRBAYCAN ÇEMPİONATI BAŞA ÇATMIŞDIR
AZƏRTAC AFFA-ya istinadən xəbər verir ki, həvəskar komandalar arasında çimərlik futbolu üzrə ilk Azərbaycan çempionatı başa çatmışdır.
Əlli səkkiz komandanın iştirakı ilə Olimpiya sistemi üzrə keçirilən turnirin son oyun günü meydançaya əvvəlcə 3-cü yer uğrunda mübarizə aparacaq komandalar - “Eskort” və “Kodak” çıxmışlar. Qarşılaşmanın əsas vaxtı heç-heçə - 5:5 hesabı ilə başa çatdığından, əlavə vaxtda daha bir dəfə fərqlənən “Kodak” klubu 3-cü yeri tutmuşdur.
Birincilik uğrunda “Novco-Sport” və “Olimp” komandaları qarşılaşmışlar. Rəqibini 8:6 hesabı ilə məğlub edən “Novco-Sport” klubu çempionatın qalibi adını qazanmışdır.
Mükafatlandırma mərasimində AFFA-nın baş katibi Elxan Məmmədov və Çimərlik Futbol Federasiyasının prezidenti Fərid Novruzi çıxış edərək qalibləri təbrik etmiş, onlara uğurlar arzulamışlar.
Bildirilmişdir ki, ölkəmizdə bundan sonra da peşəkar komandalar arasında çimərlik futbolu üzrə müxtəlif turnirlər keçiriləcəkdir.
Çempionatda birinci yer tutmuş komanda 10 min, ikinci yerin sahibi 5 min və üçüncü yerə çıxmış komanda 3 min manat məbləğində pul mükafatı və kubokla təltif edilmişdir.
Xatırladaq ki, qaliblər üçün pul mükafatı AFFA tərəfindən təsis olunmuşdur.
Bölmənin digər xəbərləri
