“Heydər Əliyev. 100 faktın tarixi” kitabının təqdimat mərasimi keçirilib
Bakı, 27 dekabr, AZƏRTAC
Dekabrın 27-də Bakı Kitab Mərkəzində “Heydər Əliyev. 100 faktın tarixi” kitabının təqdimat mərasimi keçirilib.
AZƏRTAC xəbər verir ki, Ümummilli Lider Heydər Əliyevin və Vətən uğrunda mübarizədə canlarından keçmiş qəhrəman şəhidlərin xatirəsi bir dəqiqəlik sükutla yad edildikdən sonra kitabın məsləhətçisi, Milli Məclisin deputatı Elnur Allahverdiyev “Heydər Əliyev ili” çərçivəsində hazırlanan nəşrin əhəmiyyəti haqqında fikrilərini bildirib. O diqqətə çatdırıb ki, kitabda Ümummilli Liderin Azərbaycana rəhbərliyi dövründə, xüsusilə SSRİ Nazirlər Soveti sədrinin birinci müavini və Naxçıvan Ali Məclisinin sədri kimi fəaliyyət göstərdiyi illərdə həyata keçirdiyi işlər haqqında 100 maraqlı fakt toplanıb. Vurğulanıb ki, Ulu Öndər həyatının bütün məqamlarında atdığı hər bir addımda Azərbaycan xalqının rifahını, doğma Vətəninin maraqlarını düşünüb.
Kitabın məsləhətçisi, Milli Məclisin deputatı Soltan Məmmədov Ulu Öndərin Azərbaycan tarixində müstəsna yeri olan dövlət xadimi kimi yaddaşlarda hər zaman yaşayacağını bildirib. Deputat qeyd edib ki, məhz Ümummilli Liderin müdrikliyi, qətiyyəti, uzaqgörənliyi sayəsində ötən əsrin 70-ci illərində Qarabağın Azərbaycandan qoparılmasının qarşısını almaq mümkün olub. Deputat vurğulayıb ki, bu gün Azərbaycanın qazandığı uğurların əsasında Heydər Əliyevin siyasəti və bu siyasəti uğurla davam etdirən Prezident İlham Əliyevin müdrik addımları dayanır.
Milli Məclis sədrinin birinci müavini Əli Hüseynli Ulu Öndərin siyasi irsinin hər zaman elmi tədqiqatlar üçün zəngin mənbə olduğunu vurğulayıb. O, Ümummilli Liderin Azərbaycan tarixindəki əvəzsiz xidmətləri barədə faktların ictimaiyyətə çatdırılması istiqamətində təşəbbüslərin təqdirəlayiq olduğunu qeyd edib. Prezident İlham Əliyevin Ümummilli Liderin ideyalarını müvəffəqiyyətlə həyata keçirdiyini və ölkəmizin öz ərazi bütövlüyünü, suverenliyini tam təmin etmiş güclü dövlət kimi yeni inkişaf mərhələsinə qədəm qoyduğunu diqqətə çatdırıb.
Milli Məclisin deputatı, İqtisadi siyasət, sənaye və sahibkarlıq komitəsinin sədri Tahir Mirkişili Ümummilli Liderin fəaliyyətini əks etdirən kitabların ictimaiyyət tərəfindən maraqla qarşılandığını deyib. Komitə sədri nəşrdə əksini tapmış faktların Ulu Öndərin çoxşaxəli fəaliyyəti haqqında mühüm məqamları əks etdirdiyini bildirib.
Sonra çıxış edən Milli Məclisin deputatı Etibar Əliyev, AMEA-nın vitse-prezidenti, akademik İradə Hüseynova, Azərbaycan Yazıçılar Birliyinin katibi İlqar Fəhmi Ümummilli Liderin Azərbaycan xalqı qarşısındakı tarixi xidmətlərindən danışıb, Ulu Öndərin fəaliyyəti dövründə qəbul etdiyi qərarların Azərbaycan xalqının xoşbəxt gələcəyinə xidmət etdiyini vurğulayıblar.
Kitabın elmi redaktoru, tarix elmləri üzrə fəlsəfə doktoru Yəhya Babanlı nəşrin məzmunu, strukturu haqqında ətraflı məlumat verib. Qeyd edilib ki, “Heydər Əliyev. 100 faktın tarixi” kitabında Azərbaycan xalqının Ümummilli Lideri, müasir Azərbaycanın qurucusu, görkəmli siyasi və dövlət xadimi Heydər Əliyevin Azərbaycan tarixindəki roluna dair 100 mühüm tarixi fakt yer alıb. Nəşrdə Ümummilli Liderin müsahibələri, çıxışları və bəyanatları, eləcə də səfərləri və müxtəlif görüşləri barədə maraqlı məlumatlar əksini tapıb.
Qeyd edək ki, “Heydər Əliyev İli” çərçivəsində ərsəyə gətirilmiş, geniş oxucu auditoriyası üçün nəzərdə tutulmuş kitabın İdeya müəllifləri və məsləhətçiləri Milli Məclisin deputatları Elnur Allahverdiyev və Soltan Məmmədovdur.
Bölmənin digər xəbərləri
