HEYDƏR ƏLİYEV ADINA SARAY YENİ MÖVSÜMƏ BAŞLAYIR
Sarayın direktoru, əməkdar mədəniyyət işçisi Fərhad Babayev AZƏRTAC-a bildirmişdir ki, Mədəniyyət və Turizm Nazirliyinin tapşırığına əsasən, binada təmir işlərinin birinci mərhələsi başa çatmışdır. Yay dövründə nazirliyin təmir-tikinti qrupu və texniki işçilərinin qüvvəsi ilə sarayın istilik sistemləri təzələnmiş, kondisionerlər, elektrik sistemi, hava təmizləyici qurğular təmir olunmuşdur.
Yeni konsert mövsümü sentyabrın 4-də başlayacaq və həmin axşam ənənəvi “Şərq-Qərb” kinofestivalının təntənəli açılışı olacaqdır. Ayın 5-də isə möhtəşəm səhnə “Azəri Star-2006” televiziya müsabiqəsi qaliblərinin ixtiyarına veriləcəkdir. Ayın 15-də isə “Bir millət, iki dövlət” adlı xeyriyyə konserti keçiriləcəkdir. Türkiyə və Rusiyanın tanınmış müğənnilərinin, teatr kollektivlərinın konsertləri və tamaşaları da nəzərdə tutulmuşdur. Sentyabrın 23-də Valeri Meladzenin (Rusiya), 24-də Gülbən Ergenin (Türkiyə) konsertləri olacaqdır. Proqram üzrə oktyabrın 1-də “Adam ol-2” filminin nümayişi, ayın 7-də Layma Vaykule (Rusiya), 8-də Sərdar Ortac (Türkiyə), 19-da Ebru Gündeş, 21-də Lyudmila Qurçenko teatrı, 30-da isə Dima Bilanın konsertləri baş tutacaqdır.
Yeni mövsümdə respublikanın xalq artisti Alim Qasımov, əməkdar artistlər Faiq Ağayev, Aygün Kazımova, Nazpəri Dostəliyeva və başqa populyar ifaçılarımız da proqramları ilə çıxış edəcəklər.
Bölmənin digər xəbərləri
