DÜNYA
Hindistan parlamenti müxalifətin etirazları səbəbindən işini dayandırıb
Bakı, 29 noyabr, AZƏRTAC
Hindistanlı biznesmen Qautam Adaninin şirkətlərinə qarşı ABŞ-da irəli sürülən ittihamların və gündəliyə daxil edilməyən digər məsələlərin müzakirəsini tələb edən müxalifət parlamentin aşağı palatasının iclasını pozub.
AZƏRTAC xəbər verir ki, müxalifət nümayəndələrinin qanunverici orqanın fəaliyyətinə mane olan hərəkətləri fonunda parlamentin spikeri Om Birla onları sakitliyə çağırsa da, heç bir nəticə əldə edə bilməyib. Nəticədə parlamentin iclasına günortayadək fasilə verib.
“Adani Group” şirkətinin sahibi ətrafında yaranan qalmaqal səbəbindən Hindistan parlamentinin işi bu həftə artıq bir neçə dəfə dayandırılıb.
Qeyd edək ki, ABŞ hindistanlı milyarderi və onun tərəfdaşlarını dələduzluq və rüşvətxorluqda ittiham edib. Prokurorluğun məlumatına görə, onlar “milyardlarla dollar dəyərində müqavilələr əldə etmək üçün Hindistan rəsmilərinə 250 milyon dollardan çox rüşvət verib, həmçinin ABŞ və beynəlxalq investorlardan kapital cəlb etmək məqsədilə özlərinin korrupsiya sxemi haqqında yalan danışıblar. Nəticədə Nyu-York məhkəməsi sərvəti 85,5 milyard dollar həcmində qiymətləndirilən Qautam Adaninin həbsinə order verib.
“Adani Group” Hindistanın siyasi və iqtisadi həyatına təsir göstərən ən böyük biznes qruplarından biridir. Şirkət ölkənin enerji, kənd təsərrüfatı və müdafiə sənayesində aparıcı mövqe tutur. “Adani Group”, həmçinin Hindistanda 4 ən böyük dəniz limanına, yeddi hava limanına sahibdir.
