HOLLANDİYA RƏSMİSİ AZƏRBAYCAN DİASPORUNU BÖYÜK QÜVVƏ HESAB EDİR
Amsterdam, 1 fevral (AZƏRTAC). Hollandiyada fəaliyyət göstərən Benilüks Azərbaycanlıları Konqresinin (BAK) mətbuat xidmətindən bildirmişlər ki, martın 3-də bu ölkənin parlamentinə keçiriləcək seçkilərlə əlaqədar müxtəlif siyasi partiyalar səsvermə hüququna malik etnik qrupların səsini toplamaq məqsədi ilə vaxtaşırı onlarla görüşlər keçirirlər.
Bu məqsədlə Amsterdam şəhər merinin müavini, Hollandiya İşçi Partiyasının (PVDA) üzvü Freek Ossel BAK-ın fəxri sədri Sahil Qasımovla görüşmüş və onunla seçki kampaniyasının gedişi barədə fikir mübadiləsi aparmışdır.
Şəhər bələdiyyə idarəsində irqi ayrı-seçkiliyə və yoxsulluğa qarşı komissiyaya rəhbərlik edən F.Ossel Niderland Krallığında yaşayan azərbaycanlıların həyat və məişəti ilə yaxından maraqlanmışdır. Hollandiya ilə Azərbaycan arasında münasibətlərin getdikcə inkişaf etdiyini, Azərbaycan diasporunun böyük qüvvə kimi ölkədə xüsusi çəkiyə malik olduğunu deyən F.Ossel, təmsil etdiyi partiyanın seçkilərdə azərbaycanlıların dəstəyinə ümid bəslədiyini bildirmişdir.
Sahil Qasımov namizədə Ermənistan-Azərbaycan, Dağlıq Qarabağ münaqişəsi, ölkəmizin ərazisinin 20 faizinin Ermənistan tərəfindən işğal edilməsi, bir milyondan artıq insanın qaçqın və məcburi köçkün kimi ağır problemlə üzləşməsi barədə məlumat vermişdir. O, Azərbaycan həqiqətləri barədə Avropada, o cümlədən Niderland Krallığında ətraflı məlumat əldə edilməsində parlament deputatlarının xüsusi rolunu vurğulamışdır. S.Qasımov diaspor üzvlərinin Azərbaycanı dəstəkləyən partiyanın namizədlərinə səs verəcəyini F.Osselin diqqətinə çatdırmışdır.
Əsgər Əliyev
AZƏRTAC-ın xüsusi müxbiri
Amsterdam
######
Bölmənin digər xəbərləri
