HOLLANDİYADA AZƏRBAYCANLA BAĞLI 3 SƏNƏDLİ FİLM NÜMAYİŞ ETDİRİLMİŞDİR
Hollandiyada fəaliyyət göstərən Benilüks Azərbaycanlıları Konqresinin (BAK) mətbuat xidmətindən AZƏRTAC-ın xüsusi müxbirinə bildirmişlər ki, iyulun 29-da qurumun Rotterdam şəhərindəki qərargahında bu ölkədə yaşayıb yaradan azərbaycanlı rejissor Ramiz Hindarxlının (Əliyevin) çəkdiyi “Azərbaycan: dünən və bu gün”, ”Azadlığa gedən yol”, “Vətən mənə oğul desə...” sənədli filmləri nümayiş etdirilmişdir. Tamaşaçıların - yerli ictimaiyyətin nümayəndələrinin, Hollandiyada yaşayan soydaşlarımızın və türk diasporu təmsilçilərinin xahişi ilə filmlərin nümayişi bir neçə dəfə təkrar edilmişdir.
Eldar Quliyevin ssenarisi əsasında çəkilmiş “Azərbaycan: dünən və bu gün” filmində Sovetlər dövründən milli azadlıq hərəkatının başlandığı dövrə qədər ölkəmizdə baş vermiş hadisələr öz əksini tapmışdır. ”Azadlığa gedən yol” 1988-ci ilin məlum hadisələrindən 1990-cı ilin “Qara Yanvar” faciəsinədək olan dövrü əhatə edir. Tanınmış yazıçımız İsi Məlikzadənin ssenarisi əsasında yaradılmış “Vətən mənə oğul desə...” filmində isə işğalçılıq siyasəti yeridən erməni hərbçilərinin mühasirəsinə düşmüş azərbaycanlı döyüşçüləri xilas etmək üçün özünü düşmən tankının altına ataraq partlatmış, onlarla döyüş yoldaşının həyatını xilas etmiş və vətənimizin ərazi bütövlüyü uğrunda həlak olmuş Milli Qəhrəman Etibar İsmayılovun həyat və döyüş yolundan söz açılır.
Sonda rejissor R.Hindarxlı ona həmişə dəstək vermiş və belə bir tədbirin keçirilməsinə yaxından köməklik göstərmiş Dünya Azərbaycanlıları Konqresinə minnətdarlığını bildirmişdir.
Xatırladaq ki, holland kinematoqrafçıları filmlərə xüsusi maraq göstərmişlər. Yaxın vaxtlarda həmin filmlər DAK-ın dəstəyi ilə holland dilinə tərcümə ediləcəkdir.
Bölmənin digər xəbərləri
