HOLLANDİYADA DÜNYA AZƏRBAYCANLILARININ HƏMRƏYLİYİ GÜNÜ QEYD OLUNMUŞDUR
AZƏRTAC xəbər verir ki, dekabrın 26-da Hollandiyanın Haaqa şəhərində “Ana Vətən” Avropa Azərbaycanlı Qadınlar Birliyinin təşəbbüsü ilə Dünya azərbaycanlılarının həmrəyliyi günü və Yeni il münasibətilə tədbir keçirilmişdir.
Azərbaycanın Belçika və Lüksemburqdakı səfirliyinin birinci katibi, Beniluks Azərbaycan Təşkilatlarını Əlaqələndirmə Şurasının (BATƏŞ) fəxri prezidenti Fuad Humbətov, Belçikadakı diaspor təşkilatlarının nümayəndələri iştirak etmişlər.
“Ana Vətən” Avropa Azərbaycanlı Qadınlar Birliyinin sədri, Avropa Azərbaycanliları Konqresinin birinci vitse-prezidenti Gulşən Kazımova demişdir ki, 31 dekabr - Azərbaycan xalqının müstəqilliyini bərpa etdiyi vaxtdan bütün dünyada yaşayan soydaşlarımıza bəxş edilən və ümummilli əhəmiyyət kəsb edən çox əlamətdar gündür. Bu bayramın əsas qayəsini dünya azərbaycanlılarının birliyi və həmrəyliyi, Azərbaycan dövlətçiliyi, xalqımızın milli mənəvi dəyərlərinə hörmət, Azərbaycan xalqına mənsubluq, tarixi Vətənə bağlılıq hissi və ideyaları təşkil edir. Hər bir azərbaycanlı dünyanın hansı ölkəsində yaşamasından asılı olmayaraq, Azərbaycan dövlətinin, cəmiyyətinin problemləri ilə yaşamalı, onların həlli üçün mənəvi məsuliyyət hiss etməlidir.
G.Kazımova bildirmişdir ki, “Ana Vətən” Avropa Azərbaycanlı Qadınlar Birliyi də oz növbəsində qarşıda duran vəzifələri layiqincə yerinə yetirməyə çalişacaqdır.
Azərbaycanın Belcika və Lüksemburqdakı səfirliyinin birinci katibi Fuad Humbətov Dünya azərbaycanlılarının həmrəyliyi gününün təsis edilməsinin çağdaş azərbaycançılıq ideyalarının formalaşması, milli birlik və həmrəylik ideyalarının yayılması istiqamətindəki əhəmiyyətindən bəhs etmiş, bu günün ölkəmizdə, eləcə də xarici dövlətlərdə yüksək səviyyədə qeyd olunması və onun tarixi əhəmiyyətinin soydaşlarımıza izah edilməsinin ümummilli liderimiz Heydər Əliyev tərəfindən qarşımıza qoyulmuş əsas vəzifələrdən biri olduğunu qeyd etmişdir.
Sonra F.Hümbətov Prezident İlham Əliyevin 31 dekabr Dünya azərbaycanlılarının həmrəyliyi günü münasibətilə soydaşlarımıza müraciətini oxumuş, sənəddə qeyd olunan müddəalara diaspor təşkilatlarımızın yaxın perspektivdəki fəaliyyətlərində rəhbər prinsiplər kimi əməl olunmasının zəruriliyini vurğulamışdır.
F.Hümbətov müraciətdəki önəmli ideyaları şərh etmiş və bildirmişdir ki, bu gün məkrli, işğalçı erməni təbliğatını ifşa etmək, ona qarşı hücum taktikasına keçmək üçün Benilüks dövlətlərindəki Azərbaycan diasporunun böyük intellektual potensialı vardır. Bu potensialın reallaşdırılması üçün bütün xarici ölkələrdə olduğu kimi, Benilüksdəki diaspor təşkilatlarının da həmrəyliyi və mütəşəkkilliyinin güclənməsi, ümummilli ideyalar ətrafında birləşməsi, türk diaspor təşkilatları, dost xalqların müvafiq qurumları ilə əməkdaşlıq əlaqələrinin inkişafı mühüm əhəmiyyət kəsb edir.
Qeyd olunan məsələ ilə əlaqədar Beniluks Azərbaycan Təşkilatlarını Əlaqələndirmə Şurasının nizamnaməsinə dəyişikliklər edilmişdir.
Tədbirdə “Benilüks dövlətlərində 2007-ci ilin ən fəal Azərbaycan diaspor təşkilatı” kimi “Ana Vətən” Avropa Azərbaycanlı Qadınlar Birliyi idarə heyətinə BATƏŞ adından hədiyyələr təqdim edilmişdir.
Bayram toplantısı milli süfrəmiz ətrafında perspektiv planlar haqqında maraqlı söhbətlərlə davam etdirilmişdir.
Bölmənin digər xəbərləri
